Tragjedia në Shkodër, nëna dhe fëmijët varrosen ndaras

Tragjedia e familjes Arrazi dyshohet se është pasojë e dhunës psikologjike dhe tradhtisë bashkëshorte

Është përcjellë në banesën e fundit Alma Arrazi, e cila u hodh në lumin Buna bashkë me tre fëmijët e saj, duke gjetur vdekjen.

Pasi është dërguar në Durrës sipas kërkesës së babait, ajo është varrosur këtë mesditë në varrezat e reja të qytetit, ndërsa në ceremoni kanë marrë pjesë pak njerëz.

39 vjeçarja Alma Arrazi e cila u vetëmbyt në lumin Bunë bashkë me 3 fëmijët e saj si pasojë e dhunës dhe tradhtisë së bashkëshortit u varros në qytetin e Durrësit, aty ku prehet nëna e saj.

Mes lotësh dhe dhimbjes ceremonia mortore për Alma Arrazin u zhvillua në orën 12:00 në Durrës, ndërsa homazhet për të u mbajtën në Kamëz. Për ta përcjellë në banesën e fundit, të pranishëm ishin pak njerëz, ndërsa familja e saj, babai, motra dhe vëllai ishin aty, shkruajnë mediat shqiptare, përcjell albinfo.ch.

Kurse 3 fëmijët e saj do të prehen në varrezat e qytetit të Shkodrës pranë familjes së të atit shumë kilometër larg nga nëna e tyre. Ceremonia mortore për to u zhvillua në të njëjtën orë me Almën, ndërsa Erdgys Arrazit, i cili po mbahet në paraburgim për shkaktim të vetëvrasjes, nuk iu aprovua kërkesa që të marrë pjesë në funeralin e vajzës 7 vjeçe dhe djalit 3 vjeçar.

Prokuroria e Shkodrës dha aprovim për kërkesën e Arrazit, ndërkohë që policia e Shkodrës dhe Drejtoria e Burgjeve e kanë refuzuar. Arrazi nuk u lejua as në ceremoninë mortore të vajzës 9-vjeçare që u zhvillua dy ditë më parë.

39-vjeçarja u hodh nga ura e Bunës bashkë me fëmijët mbrëmjen e 2 Majit. Ngjarja tragjike u zbulua kur u gjet rastësisht nga një peshkatar trupi i vajzës së parë, ndërsa trupat e tjerë u gjetën pas 3 ditë kërkimesh nga polumbarët.

Tragjedia e familjes Arrazi dyshohet se është pasojë e dhunës psikologjike dhe tradhtisë bashkëshorte. Në akuzë, si shkaktar i vetëvrasjes është bashkëshorti i të ndjerës, Erdgys Arrazi u la pas hekurave një ditë më parë nga Gjykata e Shkodrës ku para togave të zeza, u shfaq në gjendje të rënduar psikologjike

 

---