Vodhi orën e 20 mijë eurove nga valixhja e udhëtarit, arrestohet punëtori i aeroportit të Tiranës

pixabay

Policia e Shqipërisë ka njoftuar se ka arrestuar një punonjës të aeroportit të Rinasit, pasi akuzohet segjatë transportimit të bagazheve, ka vjedhur nga një valixhe një orë të shtrenjtë, që kap vlerën e rreth 20 mijë eurove.

Sipas njoftimit të policisë, arrestimi i 24-vjeçarit erdhi pas kallëzimit të depozituar nga një 30-vjeçar, se kushëririt të tij, i cili kishte udhëtuar nga Rinasi drejt Athinës, i kishin vjedhur një orë të kushtueshme, të cilën e mbante në bagazhet e tij dhe vjedhjen e së cilës ai e kishte konstatuar në momentin kur kishte arritur në Athinë.

Në vijim të veprimeve u bë arrestimi i autorit të dyshuar, shtetasit Klajdi Q., 24 vjeç, banues në Krujë, me detyrë punonjës për ngarkimin dhe shkarkimin e bagazheve, në aeroportin e Rinasit.