National Geographic France: Një udhëtim nëpër zemrën e egër të Shqipërisë

Vjosa, e cila shtrihet në 270 kilometra, u shpall parku i parë lumor i egër në Evropë në mars të vitit 2023

“Një udhëtim nëpër zemrën e egër të Shqipërisë, një simbol triumfues i mbrojtjes së mjedisit”, titullohet artikulli i “National Geographic France” kushtuar përvojave të jashtëzakonshme që përjetohen në parkun kombëtar të Vjosës, lumit të vetëm të egër në Evropë.

Artikulli në revistën prestigjioze “National Geographic France” mban emrin e Amelia Duggan dhe i kushtohet Parkut Kombëtar të lumit Vjosa.

Një brez i ri i pasionuar po promovon rajonet idilike të Shqipërisë së Jugut, ku mund të darkoni me barinj, të laheni në burime të nxehta dhe të lundroni në parkun e parë lumor të egër në Evropë, shkruan ATSH, transmeton albinfo.ch.

Në fund të një vere të gjatë e të thatë, ku mbizotëron qielli pa re, rrymat e lumit të fuqishëm Vjosa janë qetësuar. Gjë që më përshtatet shumë, pasi jam ulur në një kajak duke lundruar në grykat e lashta të Këlcyrës.

Përrenj përshkojnë muret prej guri dhe rrjedhin poshtë në pellgun e ujit përmes bollëkut të vegjetacionit që sfidon gravitetin dhe pemëve të palëvizura e të përdredhura.

Është një nga lumenjtë e fundit me rrjedhje të lirë në Evropë, praktikisht i vetmi lumë i madh në kontinent që nuk është i ndotur nga digat. Për më tepër, më në fund u fitua një betejë e gjatë për të ruajtur ritmin e tij natyror dhe ekosistemet e rëndësishme. Zhys lopatën në ujërat bruz të Vjosës, të cilat rrjedhin pandërprerë nga malet greke të Pindit në qytetin bregdetar shqiptar të Vlorës.

Teksa drejtoj kajakun tim nëpër kanale piktoreske, filloj të kuptoj perse ky lumë, i cili është ngritur lart në poezi dhe këngë përgjatë shekujve është kaq i rëndësishëm për vendasit dhe perse një fushatë shumëvjeçare që synon ruajtjen e tij bëri jehonë me markën e veshjeve Patagonia dhe aktorin Leonardo DiCaprio.

Vjosa, e cila shtrihet në 270 kilometra, u shpall parku i parë lumor i egër në Evropë në mars të vitit 2023.

Sot, guidat e udhëtimit pararojë, të cilët janë mobilizuar për të shpëtuar «zemrën blu» të vendit e mbajnë këtë fitore si një medalje nderi.

 

---