BE-ja kërkon alternativa për normalizimin e marrëdhënieve Kosovë-Serbi

Shefja për Politikë të Jashtme të Bashkimit Evropian, Kaja Kallas, ka deklaruar se BE-ja është e interesuar për normalizimin e marrëdhënieve mes Kosovës dhe Serbisë, qoftë përmes dialogut të ndërmjetësuar nga Brukseli apo ndonjë mekanizmi tjetër.

Në një intervistë për Radion Evropa e Lirë, Kallas u shpreh se dialogu mes dy vendeve duket i bllokuar, pasi palët “vetëm ankohen për njëra-tjetrën”. Ajo paralajmëroi se do të shqyrtojë opsione të reja në bashkëpunim me Përfaqësuesin e Posaçëm të BE-së për dialogun Kosovë–Serbi.

“Ndoshta është dialogu, ndoshta është një tjetër mjet. Jam e gatshme ta shqyrtoj këtë çështje dhe do ta bëj këtë së bashku me Përfaqësuesin e Posaçëm në ditët në vijim,” tha Kallas, e cila pritet të vizitojë Ballkanin Perëndimor javën e ardhshme, transmeton albinfo.ch.

Duke folur për protestat e fundit në Serbi, ajo i cilësoi ato si pjesë të një procesi demokratik, duke theksuar se ngjarje të tilla ndodhin edhe në vendet anëtare të BE-së.

Kallas gjithashtu komentoi mbi ndikimin e luftës tregtare mes BE-së dhe SHBA-së, situatën në Ukrainë dhe rolin e Evropës në negociatat për një armëpushim të mundshëm. Ajo theksoi se Evropa duhet të jetë pjesë e çdo marrëveshjeje që prek sigurinë e kontinentit dhe se vendet anëtare të BE-së duhet të zbatojnë vendimet e Gjykatës Ndërkombëtare Penale.