Rutte: Duhet të sigurohemi që situata në Kosovë të mbetet stabile

Foto sc FB: MinPres Mark Rutte

Sekretari i Përgjithshëm i NATO-s, Mark Rutte, ka ritheksuar nevojën që autorët e sulmit në Banjskë dhe atij ndaj pjesëtarëve të KFOR-it në veri të Kosovës më 2023 të mbahen përgjegjës, duke theksuar se për këtë duhet të punojë Serbia.

Gjatë një konference për media në Bruksel, Rutte theksoi rëndësinë e stabilitetit në Kosovë, duke vënë në dukje se NATO e ndjek nga afër situatën e sigurisë në rajon, transmeton albinfo.ch.

“Situatën e sigurisë në Kosovë e përcjellim nga afër dhe duhet të sigurohemi se situata, që nga viti 1999 është shumë më stabile tani, të vazhdojë. Sa i përket Banjskës dhe sulmit ndaj trupave të KFOR-it, serbët duhet të punojnë për përgjegjësi. E kemi diskutuar këtë me Vuçiqin në telefon, por edhe kur drekuam në Bruksel dy javë më parë,” deklaroi ai.

I pyetur nëse NATO ishte konsultuar paraprakisht për marrëveshjen e bashkëpunimit në mbrojtje mes Serbisë dhe Hungarisë, të nënshkruar më 1 prill, Rutte u përgjigj se Aleanca nuk ishte konsultuar në këtë çështje. Ai gjithashtu përmendi marrëveshjen e bashkëpunimit mes Kosovës, Shqipërisë dhe Kroacisë, duke aluduar në përpjekjet për forcimin e sigurisë dhe bashkëpunimit rajonal.

Deklaratat e Rutte vijnë në një kohë kur situata e sigurisë në veri të Kosovës mbetet një çështje e ndjeshme, me thirrjet e NATO-s dhe faktorëve ndërkombëtarë për përgjegjësi dhe dialog mes palëve, transmeton albinfo.ch.