Qeveria zvicerane: Disa marrëveshje të BE-së mund të refuzohen nga parlamenti ose elektorati

Ndërsa marrëveshjet mes Zvicrës dhe Bashkimit Evropian janë në prag të diskutimeve parlamentare në Bernë, qëndrimet mbi natyrën e tyre mbeten të ndryshme. Komisioni Evropian ka ritheksuar se të gjitha marrëveshjet e negociuara me Zvicrën janë pjesë e një pakete të vetme, ndërkohë që kryenegociatori i BE-së, Richard Szostak, sugjeron se ekziston mundësia që disa elementë të trajtohen ndaras, shkruan Swissinfo.ch, transmeton albinfo.ch.

Javën e kaluar, qeveria zvicerane prezantoi planin për t’i paraqitur parlamentit katër rezoluta të ndara gjatë vitit 2024: një për stabilizimin e marrëdhënieve me BE-në dhe tri të tjera për bashkëpunim në fushat e sigurisë ushqimore, energjisë elektrike dhe shëndetit publik.

Megjithatë, Këshilli Federal paralajmëroi se një apo më shumë nga këto marrëveshje mund të refuzohen nga parlamenti apo elektorati përmes referendumit, gjë që do të ndalonte hyrjen e tyre në fuqi. Kjo është e mundur vetëm nëse më parë zbatohet marrëveshja e stabilizimit të marrëdhënieve.

Në një reagim për agjencinë Keystone-SDA, një zëdhënës i Komisionit Evropian theksoi të martën se “të gjitha marrëveshjet dhe protokollet u negociuan si një paketë dhe u përfunduan si të tilla në dhjetor 2024.” Sipas tij, këto dokumente do të hyjnë në fuqi vetëm pas ratifikimit nga të dyja palët, transmeton albinfo.ch.

Megjithatë, Szostak, i cili paraqiti marrëveshjet e reja para një komisioni të Parlamentit Evropian në shkurt, mbështeti qasjen zvicerane në parim. Ai tha se paketa e stabilizimit është kushti fillestar për hyrjen në fuqi të çdo marrëveshjeje tjetër. Kjo do të thotë se elementët e tjerë mund të qëndrojnë pezull në rast se stabiliteti i përgjithshëm i marrëdhënieve nuk sigurohet më parë.

Kjo qasje pasqyron edhe mënyrën sesi BE-ja ka përfshirë kërkesat e saj thelbësore  si lëvizja e lirë e njerëzve dhe kontributi i kohezionit  në marrëveshjen e stabilizimit. Ndërkohë që Zvicra synon të ruajë hapësirë për fleksibilitet politik të brendshëm, BE-ja vazhdon të mbajë qëndrimin e një pakete të pandashme për të siguruar konsistencë në marrëdhëniet dypalëshe, transmeton albinfo.ch.