Ulet aeroplani i parë në Aeroportin e Vlorës

Sot ndodhi fluturimi i parë certifikues në Aeroportin Ndërkombëtar të Vlorës

Aeroporti i Vlorës të enjten ka nisur funksionimin, teksa një aeroplan është ulur për herë të parë. Bëhet fjalë për fluturimin e parë certifikues, shkruan A2, përcjell albinfo.ch.

Të pranishëm në ceremoni janë kryeministri Edi Rama dhe zv. ministrja Belinda Balluku.

“Shumë urime dhe me këmbë të mbarë të gjithë punonjësve të rinj të aeroportit të Vlorës. Falenderoj edhe grupin e ardhur nga Kosova. Shpreh besimin se kjo shqiponjë dykrenare që është krijuar me dy grupet, do e ngrejë shumë lart emrin e këtij aeroporti. Falenderoj edhe ata që besuan e punuan për këtë projekt, që ishte tejet sfidues”, ka thënë Rama.

Ky është aeroporti i tretë në Shqipëri, pas Rinasit dhe Kukësit. Teksa ai në Rinas vazhdon të jetë një prej aeroporteve më të ngarkuara në rajon, në Kukës është mbyllur për shkak se nuk ka fluturime.

Balluku: Ky aeroport brenda kësaj vere do të jetë operacional, kur e nisëm këtë projekt duke parë edhe studimet flitej 104 milionë euro, terminal 5 mijë metra katrorë, deri tani 140 milionë euro, terminali 17 metra katrorë i trefishuar nga çka ishte në studimin fillestar, për shkak të numrave të rritur që kemi në acviacionin civil. Në aeroportet do të jenë tre modele biznesi, do të jetë mirëmbajtja e avionëve, një sektor i ri i cili do të sjellë të ardhura shtesë, kargo e mirëfilltë. Do ngrihet akademia e aviacionit civil.

---