Votimi elektronik përfaqëson qytetarët zviceranë jashtë vendit si kurrë më parë

(KEYSTONE/Christian Beutler)

Për herë të parë, qytetarët zviceranë në 50 vende të botës përdorën votimin elektronik për të zgjedhur përfaqësuesit e tyre në Këshillin e Zvicrës Jashtë Vendit (CSA) për legjislaturën 2025–2029, në një proces që pritet të rrisë përfaqësimin dhe legjitimitetin demokratik të këtij organi, shkruan swissinfo.ch., transmeton albinfo.ch.

Votimi u realizua përmes mjetit UniVote, i zhvilluar nga Universiteti i Shkencave të Aplikuara të Bernës. Sipas Organizatës së Zvicrës Jashtë Vendit (OSA), ky hap përpara ka ndikuar pozitivisht në rritjen e pjesëmarrjes elektorale në zonat përkatëse.

Në Australi, një nga shembujt më të spikatur, pjesëmarrja u rrit nga 0.1% në 5.8% pas futjes së votimit të drejtpërdrejtë online. Në total, 13,500 qytetarë zviceranë jashtë vendit morën pjesë në zgjedhje përmes kësaj platforme.

Parlamenti i Zvicrës së Pestë,  siç quhet ndryshe CSA, është organi më i lartë i Zvicrës Jashtë Vendit dhe zgjidhet çdo katër vjet. Kjo nismë, sipas OSA, synon të forcojë transparencën, demokracinë e brendshme dhe përfaqësimin real të diasporës zvicerane në vendimmarrje, transmeton albinfo.ch.

Zvicra Jashtë Vendit është e organizuar në 55 zona zgjedhore në mbarë botën. Nga këto, 13 zona, që përfshijnë rreth 50 vende me gjithsej 243,000 qytetarë të regjistruar, implementuan këtë vit sistemin e ri të votimit elektronik.

Procesi i votimit përfundoi më 11 maj, ndërsa rezultatet përfundimtare pritet të konfirmohen në gusht. Deri atëherë, do të zgjidhen edhe delegatët e mbetur në zonat që ende përdorin metodën tradicionale përmes shoqatave zvicerane lokale.

Me këto zhvillime, OSA planifikon të zgjerojë më tej përdorimin e votimit elektronik në të gjithë botën, me synimin për të përfshirë sa më shumë zërat e diasporës zvicerane në jetën politike të vendit, transmeton albinfo.ch.