Aksidenti në Gotthard: Raporti përfundimtar i hetimit zbardh dëmet në vlerên e 150 milionë frangave

Më 10 gusht 2023, një tren mallrash doli nga shinat në Tunelin Bazë të Gotthardit, duke shkaktuar dëme të mëdha infrastrukturore. Sot, hetuesit federalë të aksidenteve kanë paraqitur raportin përfundimtar për ngjarjen që tronditi transportin hekurudhor zviceran.

Çfarë ndodhi?

Një rrotë e thyer ishte shkaku i aksidentit. Treni, që udhëtonte nga Ticino drejt Gjermanisë, doli nga shinat në mes të një prej projekteve më të kushtueshme infrastrukturore në Evropë  Tunelit Bazë të Gotthardit.

Raporti përfundimtar i Bordit Zviceran për Hetimin e Aksidenteve të Transportit (SUST) konfirmon se rrota kishte çarje vertikale që ishin zgjeruar për shkak të “stresit termik”, si pasojë e frenimit të vazhdueshëm direkt mbi rrota. Defekti nuk ishte zbuluar nga kontrollet rutinë, transmeton albinfo.ch.

Pasojat

Shinat u shkatërruan për disa kilometra.

Dëmi material arrin në rreth 150 milionë franga zvicerane.

Tuneli ishte pjesërisht i mbyllur për më shumë se një vit.

U desh të përdorej rruga malore alternative për pasagjerët dhe mallrat.

Masat që rekomandohen

Ekspertët kërkojnë kontrolle më të shpeshta dhe më të thelluara të rrotave dhe boshtit të tyre. Gjithashtu, do të shqyrtohet përbërja metalurgjike e frenave për të gjetur materiale më të qëndrueshme. Problemi nuk është i izoluar  prek shumicën e vagonëve të mallrave në Evropë.

Edhe pse janë regjistruar rreth dhjetë çarje të ngjashme të rrotave në rrjetin evropian në vitet e fundit, vetëm pas aksidentit në Gotthard filloi një hetim serioz mbi këtë çështje.

Kush duhet të mbajë përgjegjësi?

Aktualisht, SBB dhe dega e saj SBB Cargo do të përballojnë kostot. Megjithatë, në parlament janë ngritur pyetje serioze: pse kompania që zotëronte vagonin problematik nuk mban përgjegjësi?

Një propozim për rritjen e përgjegjësisë së pronarëve të vagonëve është refuzuar ngushtë, por priten mocione të tjera.

 

---