Fermerët protestojnë me traktorë para Parlamentit Federal

@pixabay

Një protestë e pazakontë u zhvillua të mërkurën pasdite para ndërtesës së Parlamentit Federal, ku tre traktorë të rëndë u shfaqën papritur, të drejtuar nga anëtarë të “Lëvizjes së fermerëve bazë”, shkruan 20minuten, transmeton albinfo.ch.

Të pajisur me pankarta mbi makineritë bujqësore, protestuesit shprehën pakënaqësinë e tyre ndaj asaj që e quajtën “burokraci e tepërt”, me të cilën, sipas tyre, përballen çdo ditë në punën e tyre të përditshme.

Sipas organizatorëve të protestës, veprimi u ndërmor si reagim ndaj pakos së re bujqësore që pritet të paraqitet së shpejti nga Këshilltari Federal, Guy Parmelin. Kjo pako, që pritet të publikohet në muajt e ardhshëm, ka nxitur shqetësime mes fermerëve, të cilët paralajmërojnë se ajo mund të sjellë edhe më shumë pengesa administrative dhe ngarkesa të panevojshme për sektorin bujqësor.

“Fermerët nuk mund të mbijetojnë vetëm me letra dhe rregulla,” tha njëri nga pjesëmarrësit. Protestuesit bënë thirrje për një politikë më të kuptueshme dhe më pak të ngarkuar me kërkesa burokratike, në mënyrë që bujqësia të jetë e qëndrueshme dhe e aksesueshme për fermerët e vegjël dhe të mesëm.

Zyra e Këshilltarit Federal Parmelin ende nuk ka dhënë një koment lidhur me protestën, por pritet që drafti i paketës bujqësore të hapë një debat të gjerë publik në muajt në vijim, transmeton albinfo.ch.