Bregdeti i Shëngjinit gati për t’i pritur mijëra të rinj për Festivalin UNUM

Në bregdetin e Shëngjinit do të zhvillohet një prej ngjarjeve më të pritura verore. Nga data 5 deri më 10 qershor, Festivali Muzikor UNUM do t’i mbledhë në bregdet adhuruesit e muzikës.

Kryeministri Edi Rama publikoi sot pamje nga përgatitjet intensive për këtë aktivitet, duke e cilësuar festivalin si një “pikëtakim të përvitshëm për mijëra turistë dhe artdashës nga e gjithë Europa”, raporton atsh, përcjell albinfo.ch.

“Pesë ditë e netë fantastike të festivalit muzikor që është pikëtakimi i përvitshëm për mijëra turistë e artdashës nga gjithë Europa me skenografi rërën, pishat dhe detin, por edhe një pasaportë prezantuese e aktiviteteve verore në bregdetin shqiptar”, u shpreh Rama.

Festivali UNUM, për të gjashtin vit radhazi, pritet të sjellë një atmosferë unike dhe të nxisë turizmin në zonën e Shëngjinit gjatë sezonit veror.

Mbi 90 artistë është parashikuar të performojnë gjatë këtyre pesë ditëve.