Paralajmërim për qytetarët shqiptarë në vendet e Gjirit Persik

Ministria për Evropën dhe Punët e Jashtme e Shqipërisë u bën thirrje të gjithë shtetasve shqiptarë që ndodhen në vendet e Gjirit Persik të tregojnë kujdes të shtuar për shkak të zhvillimeve të fundit në rajon.

Në një njoftim të publikuar në faqen zyrtare në Facebook, Ministria këshillon qytetarët që: Të ndjekin me vëmendje njoftimet dhe udhëzimet e autoriteteve vendase,
Të qëndrojnë në kontakt të vazhdueshëm me përfaqësitë diplomatike dhe konsullore të Shqipërisë, Të shmangin lëvizjet e panevojshme dhe të informohen rregullisht mbi situatën e sigurisë.

“Ministria për Evropën dhe Punët e Jashtme këshillon qytetarët shqiptarë që ndodhen aktualisht në vendet e Gjirit Persik, të ndjekin njoftimet e autoriteteve vendase, të tregojnë kujdes të shtuar dhe të qëndrojnë në kontakt të vazhdueshëm me përfaqësitë tona diplomatike dhe konsullore”, thuhet në njoftim.

Ky apel vjen në kuadër të masave parandaluese për të garantuar sigurinë dhe mirëqenien e shtetasve shqiptarë që jetojnë ose qëndrojnë përkohësisht në rajonin e Gjirit.