Sekuestrohen mbi 200 kg substanca narkotike në Prishtinë, arrestohet një person

Policia e Kosovës, në bashkëpunim me Prokurorinë Speciale të Republikës së Kosovës, ka arrestuar S.J., nën dyshimin për blerje, posedim, shpërndarje dhe shitje të paautorizuar të narkotikëve dhe substancave psikotrope ose analoge.

Sipas raportit zyrtar, i dyshuari u ndalua në rajonin e Prishtinës, dhe gjatë kontrollit të kamionit që po drejtonte, hetuesit sekuestruan mbi 200 kilogramë substanca narkotike.

Hetuesit e Drejtorisë për Hetimin e Trafikimit me Narkotikë, në koordinim me Prokurorinë Speciale, po vazhdojnë veprimet hetimore në përputhje me Kodin e Procedurës Penale dhe ligjet në fuqi.

I dyshuari është ndaluar për 48 orë me vendim të Prokurorisë Speciale. Policia dhe Prokuroria Speciale kanë theksuar se angazhimi i tyre në luftimin e trafikimit dhe posedimit të narkotikëve do të vazhdojë pa kompromis, me ndjekjen penale të të gjithë personave të dyshuar për veprime të tilla.