Shoqëria “Iliria” organizon festimin e Pavarësisë së Kosovës në Francë

Festimi i Pavarësisë së Kosovës organizohet në Lyon më 21 shkurt

Shoqëria Shqiptare “Iliria” në Lyon, në bashkëpunim me Ambasadën e Republikës së Kosovës në Paris dhe Konsullin e Nderit të Kosovës në Lyon, Roger Forneris, do të organizojë një aktivitet festiv me rastin e Pavarësisë së Kosovës, transmeton albinfo.ch.

Ngjarja do të mbahet më 21 shkurt 2026, duke filluar nga ora 14:30, në ambientet e “Maison des Associations”, në adresën 28 rue Denfert Rochereau, në Lyon.

Organizatorët kanë paraparë një program të pasur kulturor dhe artistik, i cili do të përfshijë valle tradicionale, muzikë, poezi dhe një koktej për pjesëmarrësit. Aktiviteti synon të mbledhë bashkatdhetarët dhe miqtë e Kosovës për të festuar së bashku këtë datë të rëndësishme historike.

Sipas organizatorëve, këtë vit janë vënë në dispozicion 200 vende për pjesëmarrësit, duke shënuar një rritje të ndjeshme krahasuar me aktivitetin e nëntorit, ku ishin të disponueshme 110 vende.

Hyrja në këtë aktivitet është falas për të gjithë të interesuarit./Albinfo.ch.

 

---