Muzikë

SHKA “17 SHKURTI” – Një shtyllë e ruajtjes së kulturës dhe identitetit shqiptar në Austri

Shoqëria Kulturo – Artistike “17 SHKURTI”, është një emër me domethënie të veçantë historike e emocionale, i cili sot përfaqëson krenari jo vetëm për anëtarët e saj, por për mbarë komunitetin shqiptar që jeton dhe vepron në Austri

E hënë, 23 Shkurt 2026 - 11:00 Dr. Myhedin Jupa

Jeta kulturore dhe artistike e komunitetit shqiptar në Austri është ndërtuar dhe zhvilluar me shumë përkushtim përmes shoqatave dhe klubeve të ndryshme kulturore, të cilat luajnë një rol të rëndësishëm në ruajtjen e identitetit kombëtar, gjuhës, traditës dhe vlerave tona kulturore.

Një ndër shoqatat më aktive dhe më të respektuara në këtë drejtim është Shoqëria Kulturore-Artistike “17 SHKURTI”, me seli në qytetin Baden, në landin e Austrisë së Ulët (Niederösterreich), e udhëhequr me përkushtim dhe vizion nga themeluesi i saj, z. Tahir Turkaj.

SHKA “17 SHKURTI” ka një histori që daton që nga viti 2007. Në fillimet e saj, shoqëria vepronte me emrin SHKA Baden, duke u bërë shpejt një pikë referimi për shqiptarët e këtij rajoni. Pas shpalljes së Pavarësisë së Republikës së Kosovës, shoqëria vendosi ta ndryshojë emrin në “17 SHKURTI”, një emër me domethënie të veçantë historike e emocionale, i cili sot përfaqëson krenari jo vetëm për anëtarët e saj, por për mbarë komunitetin shqiptar që jeton dhe vepron në Austri.

Në kuadër të kësaj shoqërie, aktivitetin e tyre artistik ndër vite e kanë ushtruar shumë të rinj e të reja, gra e burra, të cilët me dashuri dhe përkushtim ndaj këngës dhe valles shqiptare kanë kontribuar në ruajtjen e lidhjes shpirtërore të komunitetit me atdheun. Përmes punës së tyre, kënga dhe vallja shqiptare janë bartur brez pas brezi, duke mbetur të gjalla edhe larg vendlindjes.

Veprimtaria e SHKA “17 SHKURTI” nuk kufizohet vetëm në këngë dhe valle. Në koncertet dhe manifestimet e organizuara nga kjo shoqëri, nën drejtimin e Tahir Turkajt dhe bashkëpunëtorëve të tij, janë prezantuar edhe recitime poetike, drama, skeçe dhe forma të tjera të artit skenik. Këto interpretime realizohen nga artistë shqiptarë që jetojnë dhe veprojnë në Austri, si dhe nga artistë të ftuar nga Kosova, Shqipëria dhe diaspora shqiptare, duke i dhënë aktiviteteve një dimension të gjerë kulturor dhe kombëtar.

Në organizimet e shoqërisë marrin pjesë rregullisht edhe përfaqësues të politikës lokale nga Austria e Ulët, të cilët shprehin respekt dhe vlerësim të veçantë për angazhimin e komunitetit shqiptar dhe për nivelin e integrimit të tij në shoqërinë austriake. Kjo prani dëshmon se aktivitetet e SHKA “17 SHKURTI” janë jo vetëm kulturore, por edhe ura të rëndësishme bashkëpunimi dhe mirëkuptimi ndërkulturor.

Çdo aktivitet i kësaj shoqërie përcjell emocione të forta, ndjenja mallëngjimi dhe nostalgjie për atdheun. Atmosfera që krijohet është e veçantë dhe prekëse, gjë që e bën shumë të vështirë shkëputjen nga kjo shoqëri pasi e përjeton nga afër. Kjo ndjesi është e përbashkët për të gjithë ata që i përcjellin rregullisht aktivitetet e saj.

SHKA “17 SHKURTI” është gjithashtu pjesëmarrëse e rregullt në shumë festivale ndërkombëtare kulturore, të organizuara në shtete të ndryshme evropiane, ku përfaqëson me dinjitet kulturën dhe traditën shqiptare. Megjithatë, ndër organizimet më të rëndësishme dhe më të veçanta të shoqërisë mbeten koncertet e mbajtura me rastin e ditëve të pavarësisë së dy shteteve tona shqiptare, Shqipërisë dhe Kosovës. Këto koncerte kanë një peshë të veçantë simbolike dhe emocionale për gjithë komunitetin.

Aktivitetet dhe koncertet e SHKA “17 SHKURTI” shërbejnë edhe si një ogur i mirë, duke ndihmuar në ruajtjen e identitetit dhe duke kontribuar, në një masë të konsiderueshme, në parandalimin e asimilimit kulturor. Ajo që bie veçanërisht në sy është bashkëpunimi i shkëlqyer mes gjeneratave brenda shoqërisë, ku të rinjtë dhe aktivistët e saj punojnë së bashku me respekt të ndërsjellë dhe frymë pozitive.

E gjithë kjo veprimtari e pasur kulturore bëhet e mundur edhe falë mbështetjes së shumë afaristëve shqiptarë, të cilët me sponsorizimet e tyre kontribuojnë në organizimin e ngjarjeve kulturore në mbarë Austrinë. Megjithatë, falënderimet më të mëdha i takojnë z. Tahir Turkaj, familjes së tij dhe miqve të afërt, për angazhimin e pandërprerë dhe sakrificën e tyre në shërbim të komunitetit.