FIFA rrit shpërblimet për Kupën e Botës 2026 pas presionit të federatave dhe rritjes së kostove

FIFA ka arritur një marrëveshje paraprake për të rritur shpërblimet financiare dhe tarifat e pjesëmarrjes për Kupën e Botës 2026.

Ky vendim vjen pas shqetësimeve të disa federatave kombëtare lidhur me rritjen e kostove të turneut, veçanërisht shpenzimet për udhëtime, logjistikë dhe taksa në SHBA, ku do të zhvillohet pjesa më e madhe e ndeshjeve.

Fillimisht ishte planifikuar një fond rekord prej 727 milionë dollarësh, ku çdo njëra nga 48 kombëtaret pjesëmarrëse do të siguronte të paktën 10.5 milionë dollarë, ndërsa fituesi do të merrte rreth 50 milionë dollarë.

Megjithatë, pas diskutimeve të fundit, këto shuma pritet të rriten edhe më shumë. Vendimi përfundimtar do të merret në mbledhjen e Këshillit të FIFA-s që do të mbahet në Vankuver.

Përveç shpërblimeve për kombëtaret, FIFA po shqyrton edhe rritjen e fondeve të zhvillimit që u shpërndahen 211 anëtarëve të saj, si pjesë e strategjisë së saj financiare.

Kjo është bërë e mundur falë gjendjes së fortë financiare të FIFA-s, e cila pret të gjenerojë rreth 13 miliardë dollarë të ardhura gjatë këtij cikli, kryesisht nga Kupa e Botës 2026.

Rritja e shpërblimeve shihet gjithashtu si përgjigje ndaj presionit të disa federatave, të cilat kishin frikë se do të përballeshin me humbje nëse nuk kalonin fazat e avancuara të turneut.