Mashtrim me investime në Shqipëri: Policia shkatërron rrjetin me qendra thirrjesh në Tiranë

Rrjeti përdorte video të falsifikuara me politikanë dhe figura publike për të mashtruar viktimat në Evropë dhe Amerikën e Veriut, me dëme mbi 50 milionë euro.

Autoritetet në Shqipëri kanë shkatërruar një rrjet kriminal që operonte mashtrime të mëdha financiare përmes investimeve të rreme, duke përdorur edhe video të falsifikuara (deepfake) me politikanë, sportistë dhe gazetarë të njohur.

Sipas raportimeve, më 17 prill, policia ka kryer bastisje në tre qendra thirrjesh (call center) në kryeqytetin Tiranë, duke goditur një organizatë që dyshohet se ka mashtruar qytetarë në Evropë dhe në Amerikën e Veriut, me një dëm që vlerësohet të jetë mbi 50 milionë euro.

Gjatë aksionit janë sekuestruar 891 mijë e 735 euro para të gatshme, 449 kompjuterë dhe 238 telefona mobilë, ndërsa 10 persona janë arrestuar.

Hetuesit bëjnë të ditur se rrjeti vepronte i organizuar si një kompani normale, me strukturë të plotë pune, duke përfshirë menaxherë, orare të ndërrimeve, departament të burimeve njerëzore, si dhe mbështetje teknike.

Sipas të dhënave, deri në 450 punonjës punonin në ekipe prej gjashtë deri në tetë personash dhe ishin të ndarë sipas gjuhëve të synuara, përfshirë gjermanishten, anglishten, italishten, greqishten dhe spanjishten. Punonjësit paguheshin rreth 800 euro në muaj, si dhe merrnin komision për çdo “kontratë” të realizuar.

Rrjeti, sipas hetimeve, i joshte viktimat përmes reklamave dhe videove të rreme të figurave publike, duke i shtyrë të investonin në platforma të dyshimta. Shumë viktima dyshohet se nuk e kanë raportuar rastin, gjë që mund të nënkuptojë se dëmi real është edhe më i madh se shifra e përmendur.

Autoritetet kanë paralajmëruar se hetimet po vazhdojnë dhe priten arrestime të tjera në lidhje me këtë rast./Albinfo.ch 

https://brnw.ch/21x257s

---