“Një brez mes rrënjëve dhe integrimit”, temë bosht e numrit të ri të albinfo.ch

Në artikullin bazë të revistës përmes rrëfimeve personale, tregohet se si dy kultura mund të bashkëjetojnë dhe të krijojnë një brez të ri të integruar dhe të suksesshëm

Është thënë gjithmonë se njerëzit që braktisin atdheun dhe vendosen në një vend të huaj, ballafaqohen mbase përgjithmonë me një jetë mes dy botëve: as atje as këtu ose edhe atje edhe këtu. Por më pak flitet për brezin pas tyre, të dytë a të tretë, i lindur e i rritur në vendin ku e kanë sjellë prindërit. Edhe pjesëtarët e këtyre brezave, që ndryshe në Zvicër njihen si “Secondos” duhet të “luftojnë” mes dy identiteteve, ndonëse konflikti është më i butë se ai me të cilin është përballur brezi i parë.

Kësaj teme, një brez në mes të rrënjëve dhe integrimit i është kushtuar numri më i ri i revistës sonë, i cili posa ka dalë ng shtypi.

Në artikullin bazë që rrah këtë temë,  përmes rrëfimeve personale, tregohet se si dy kultura mund të bashkëjetojnë dhe të krijojnë një brez të ri të integruar dhe të suksesshëm.

“Përmes 12 rrëfimeve personale, kjo temë sjell një pyetje thelbësore: a është të jesh shqiptar dhe zviceran një sfidë që duhet balancuar, apo një privilegj që krijon mundësi të reja, perspektiva më të gjera dhe një identitet më të pasur?”. Kjo është dilema e cila u del përpara të rinjve me prejardhje shqiptare që duan të çajnë rrugën e integrimit në Zvicër.

Përveç temës bosht, në këtë numër të revistës mund të lexoni edhe shumë materiale të tjera interesante, intervista, portrete etj., me temë nga diaspora.

---