Tensione në Zvërnec, Rama paralajmëron deklaratë për projektin mes protestave dhe hetimeve

Pas incidentit të dhunshëm të ndodhur një ditë më parë në zonën e Zvërnec, është hequr të dielën teli me gjemba që ishte vendosur në rrethimin e kantierit ku po zhvillohen punime.

Sipas raportimeve, vendimi vjen pas protestës së qytetarëve kundër ndërtimeve në këtë zonë, të cilët kanë ngritur pretendime për probleme në çështjet e pronësisë dhe përdorimit të tokës.

Ngjarja e një dite më parë u shoqërua me tensione, ku një qytetar u përplas me punonjës të sigurisë private që ruanin kantierin. Sipas policisë, ai është dhunuar dhe tërhequr me forcë, duke pësuar dëmtime të lehta trupore.

Në lidhje me incidentin ka reaguar edhe Ministri i Punëve të Brendshme, Besfort Lamallari, i cili e ka cilësuar të papranueshme sjelljen e rojeve private, por ka kritikuar edhe mungesën e reagimit të menjëhershëm të policisë së pranishme në vendngjarje.

Ndërkohë, Policia e Shtetit ka arrestuar një nga rojet private të përfshirë në përplasje, i identifikuar si Gerald Biba, i cili akuzohet për “Heqje të paligjshme të lirisë” dhe “Plagosje të lehtë me dashje”. Sipas autoriteteve, ai dyshohet se ka goditur me grusht një qytetar dhe më pas, së bashku me dy persona të tjerë të proceduar, e ka tërhequr me forcë.

Reagime për ngjarjen ka pasur edhe nga institucionet, të cilat kanë bërë me dije se po shqyrtohen rrethanat e plota dhe përgjegjësitë e mundshme.

Në anën tjetër, situata në terren mbetet nën vëzhgim, ndërsa pritet që kryeministri Edi Rama të dalë nesër me një deklaratë publike për projektin në Zvërnec dhe zhvillimet e fundit që kanë shkaktuar debat në opinionin publik.