Deputetë dhe zyrtarë shqiptarë në Zvicër për të studiuar modelin e referendumeve

Vizita studimore synon shkëmbimin e përvojave mbi demokracinë direkte dhe praktikat zvicerane të organizimit të referendumeve

Një delegacion nga Shqipëria, i përbërë nga deputetë të Kuvendit të Shqipërisë, përfaqësues të Komisionit Qendror të Zgjedhjeve dhe të Gjykatës Kushtetuese, ka zhvilluar një vizitë studimore në Zvicër për t’u njohur nga afër me sistemin zviceran të referendumeve dhe demokracisë direkte, përcjell albinfo.ch.

Gjatë qëndrimit në Zvicër, delegacioni u takua me përfaqësues të Parlamentit Zviceran, Kancelarisë Federale, autoritete të Kantonit të Bernës, komitete lokale të referendumeve, si dhe ekspertë akademikë të fushës.

Diskutimet u fokusuan në tema kyçe që lidhen me organizimin dhe funksionimin e referendumeve, përfshirë pragjet e vlefshmërisë, kuadrin ligjor, procedurat për nisjen e nismave qytetare, koordinimin ndërinstitucional, qasjen në media, rregullat e fushatës dhe mekanizmat e ankimimit.

Organizatorët e cilësuan vizitën si një mundësi të rëndësishme për shkëmbimin e përvojave dhe përfitimin e njohurive praktike nga një prej modeleve më të zhvilluara të demokracisë direkte në botë.

Qëllimi i kësaj vizite është që praktikat dhe përvojat e suksesshme zvicerane të mund të shërbejnë si referencë në zhvillimin e mëtejshëm të proceseve demokratike dhe referendare në Shqipëri. /Albinfo.ch

---