Rama ironizon kërkesat për dorëheqje: Dorëhiqem në vitin 2030

Rama u përgjigjet kërkesave për dorëheqje: Prisni deri në 2030

Kryeministri i Shqipërisë, Edi Rama, ka reaguar me ironi ndaj kërkesave për dorëheqjen e tij, përmes një postimi në rrjetin social Facebook, përcjell albinfo.ch.

Rama tha se kishte marrë një mesazh anonim që i kërkonte të largohej nga detyra, ndërsa vendosi t’i përgjigjej me atë që e quajti një “manifest” të dorëheqjes.

“Mirëmëngjes, dhe me kërkesën e mëposhtme për dorëheqje nga një numër i panjohur, të cilën e mirëkuptoj plotësisht duke e pranuar përulësisht, ju uroj një ditë të qetë”, shkroi ai.

Në vijim të postimit, kryeministri renditi me ironi një sërë arritjesh të qeverisë së tij, duke përsëritur shprehjen “Dorëhiqu” për transformimet urbane e rurale, ndërtimin e aeroporteve, rritjen e turizmit, hapjen e negociatave me Bashkimin Evropian, përmirësimin e ekonomisë, rritjen e pagave, si dhe investimet në arsim, shëndetësi dhe infrastrukturë.

“Dorëhiqu, sepse e ktheve Shqipërinë në një vend që sot respektohet ndërkombëtarisht. Ose mendoje kështu: Dorëhiqu… në 2030! Nuk do të na duhesh atëherë, por do të kujtojmë me siguri”, përfundoi Rama në postimin e tij.

Me këtë reagim, kreu i qeverisë iu përgjigj në mënyrë satirike kritikëve, duke mbrojtur bilancin e qeverisjes së tij dhe duke lënë të kuptohet se nuk ka ndërmend të largohet nga drejtimi i vendit./Albinfo.ch

---