Zvicra shkurton procedurën e azilit në 140 ditë

Procedurat e azilit në të ardhmen do të bëhen më të shkurta. Ky synim është proklamuar prej kohësh nga politika zvicerane ndërsa me votimin pro nga Dhoma e Kantoneve e Parlamentit ë Zvicrës ajo tash është çështje e kryer. Më parë në favor të shkurtimit të procedurës në kuadrin e rirregullimit të sistemit të azilit pati votuar edhe Dhoma Nacionale e Parlamentit.

Kështu, me ndryshimin e fundit, procedurat e azilit mund të zgjasin më së shumti 140 ditë. Por kusht për një kohëzgjatje të tillë është që azilkërkuesi gjatë gjithë kohës së procedurës të jetë i strehuar në ndonjërën nga qendrat federale të azilit, shkruan srf.ch. Këto qendra duhet të kryejnë të gjitha veprimet në kuadrin e procedurës, përfshirë edhe mbrojtjen juridike, pa pasur nevojë që azilkërkuesit të drejtohen në institucione të ndrshme përkatëse.

Nisur nga kjo, kantoneve do t`u dorëzohen vetëm ata azilkërkues për kërkesat e të cilëve nevojiten sqarime plotësuese.

Në opinionin zviceran nga partitë e ndryshme ka pasur vazhdimisht ankesa për stërzgjatjen e procedurave të azilit, gjë që, sipas kritikëve u krijon mundësi për mbetje të përhershme në Zvicër edhe azilkërkuesve që nuk e meritojnë strehimin në këtë vend.