Në Zvicër po planifikohet një arenën spektakolare prej 450 milionë frangash, stadium me 33 mijë vende

“Cervin Coliseum” synon të shndërrohet në një qendër të madhe sportive dhe argëtuese në Sion, me stadium të mbuluar, hotel, koncerte dhe rreth 100 aktivitete në vit.

FC Sion ka prezantuar projektin ambicioz për ndërtimin e një arene të re multifunksionale në Sion, me një kosto të parashikuar prej rreth 450 milionë frangash zvicerane. Projekti, i pagëzuar “Cervin Coliseum”, synon të krijojë një kompleks që do të shërbejë jo vetëm për futboll, por edhe për koncerte, sporte të ndryshme dhe aktivitete turistike gjatë gjithë vitit, transmeton albinfo.ch. 

Klubi zviceran e ka dorëzuar zyrtarisht projektin “Sion 2030” për shqyrtim paraprak te autoritetet e kantonit Valais dhe qytetit të Sionit. Pas projektit qëndron presidenti dhe pronari i FC Sion, Christian Constantin, i cili ka deklaruar se është i gatshëm të marrë pjesë edhe në financimin e tij.

 

Deri në 33 mijë spektatorë

Sipas konceptit të prezantuar, arena do të ketë 21 mijë vende për ndeshjet e futbollit, ndërsa për koncertet kapaciteti mund të rritet deri në 33 mijë persona.

Emri “Cervin Coliseum” është një referencë ndaj Matterhornit dhe Koloseut të Romës, duke synuar që objekti të bëhet një prej pikave më të rëndësishme arkitekturore dhe turistike të Sionit.

Arena do të jetë e konceptuar si një kompleks multifunksional. Në njërën anë të fushës parashihet një skenë e përhershme për koncerte, ndërsa çatia do të mund të mbyllet plotësisht. Kjo do të mundësonte zhvillimin e aktiviteteve pavarësisht kushteve atmosferike.

Për koncertet, mbi fushën natyrale të futbollit do të vendosej një sipërfaqe mbrojtëse, ndërsa bari natyral mund të zëvendësohej brenda pak orësh me një dysheme të përshtatshme për aktivitete të tjera.

 

Hotel me 80 dhoma dhe një slitë rul rreth ndërtesës

Një hotel me rreth 80 dhoma është pjesë e kompleksit të planifikuar.

Por elementi që e bën projektin veçanërisht të pazakontë ndodhet në pjesën e jashtme të arenës: projektuesit kanë paraparë një slitë rul (roller coaster) që do të përshkojë fasadën e kompleksit, duke përfshirë edhe një looping.

Ideja nuk është vetëm dekorative. Sipas projektit, atraksioni do të mund të funksiononte edhe në ditët kur në arenë nuk zhvillohet asnjë ndeshje apo koncert, me synimin që kompleksi të tërheqë vizitorë gjatë gjithë vitit.

 

Synohen rreth 100 aktivitete në vit

Pronari i FC Sion, Christian Constantin, synon që arena të mos jetë aktive vetëm gjatë ndeshjeve të futbollit. Plani është që aty të zhvillohen rreth 100 aktivitete të tjera në vit.

Përveç koncerteve, ku synohet të ftohen edhe artistë me famë ndërkombëtare, në arenën e re mund të zhvillohen turne tenisi, ndeshje hokeji mbi akull dhe gara të sporteve luftarake.

Sipas projektit, përdorimi intensiv i kompleksit konsiderohet thelbësor për ta bërë atë ekonomikisht të qëndrueshëm në planin afatgjatë.

 

Nëse gjithçka shkon sipas planit, hapja mund të bëhet në vitin 2033

Tani projekti është në duart e autoriteteve kompetente të kantonit Valais dhe qytetit të Sionit. Fillimisht do të shqyrtohen kushtet teknike dhe mundësia e realizimit të projektit.

FC Sion shpreson që projektin ta bëjë publik për procedurën zyrtare të lejes së ndërtimit në mesin e vitit 2027, ndërsa funksionalizimi i arenës, sipas planifikimeve aktuale, mund të bëhet nga viti 2033.

Megjithatë, realizimi i “Cervin Coliseum” në këtë formë nuk është ende i garantuar. Edhe në faqen e projektit theksohet se përmbajtjet e publikuara janë jo detyruese.

Në ndërkohë, FC Sion vazhdon t’i zhvillojë ndeshjet në Stade de Tourbillon, stadiumi aktual i klubit, i cili është në përdorim që nga viti 1968 dhe ka një kapacitet prej rreth 14 mijë spektatorësh./Albinfo.ch 

---