Ambasadorët e Gjermanisë dhe Britanisë urojnë Shiroka-Pulën: Presim të punojmë bashkë për Kosovën

Ambasadori i Gjermanisë në Kosovë, Rainer Rudolph, dhe ai i Mbretërisë së Bashkuar, Jonathan Hargreaves, e kanë uruar Justina Shiroka-Pulën për zgjedhjen e saj Presidente të Republikës së Kosovës.

Në letrën e tij drejtuar presidentes së re, ambasadori gjerman Rainer Rudolph ka theksuar se Gjermania dhe Kosova kanë një partneritet të fortë dhe të qëndrueshëm, përcjell albinfo.ch.?

Ai ka thënë se bashkëpunimi ndërmjet dy vendeve ka luajtur rol në promovimin e stabilitetit dhe zhvillimit në rajon, ndërsa ka shprehur gatishmërinë për të punuar me Shiroka-Pulën në avancimin e agjendës evropiane të Kosovës.

“Gjermania dhe Kosova gëzojnë një partneritet të fortë dhe të qëndrueshëm. Ky bashkëpunim i ngushtë ka luajtur një rol kyç në promovimin e stabilitetit dhe zhvillimit në rajon. Mezi pres të punoj me ju për të çuar përpara agjendën evropiane të Kosovës”, thuhet në letrën e urimit.

Edhe ambasadori britanik në Kosovë, Jonathan Hargreaves, e ka uruar Shiroka-Pulën për zgjedhjen në krye të shtetit.

Përmes një postimi, Hargreaves i ka uruar asaj sukses në detyrën e re, duke e cilësuar atë si një rol të rëndësishëm.

“Urimet e mia të përzemërta për Justina Shiroka-Pulën për zgjedhjen e saj Presidente e Republikës së Kosovës. I uroj çdo sukses në këtë rol të rëndësishëm”, ka shkruar ai.

Ambasadori britanik ka shprehur gjithashtu gatishmërinë për të bashkëpunuar me presidenten e re dhe institucionet e Kosovës për thellimin e partneritetit ndërmjet dy vendeve.

“Pres me kënaqësi të punoj me Presidenten dhe të gjitha institucionet e Kosovës për ta thelluar partneritetin tonë të kahershëm, ndërsa Kosova ecën drejt një të ardhmeje shumëetnike, demokratike dhe euroatlantike”, ka deklaruar Hargreaves./Albinfo.ch

---