Profesori i Biologjisë nga Gjilani, Artan Jakupi, ka arritur të verifikojë në nivel molekular dhe gjenetik një mostër të kërpudhës Pleurotus ostreatus, pas një procesi kërkimor që përfshiu izolimin, kultivimin dhe analizat laboratorike, transmeton albinfo.ch.
Sipas Jakupit, identiteti gjenetik dhe taksonomik i mostrës së marrë në Kosovë është konfirmuar nga një institut i specializuar shkencor në Gjermani. Ai e cilëson këtë rezultat si një hap drejt dokumentimit shkencor të biodiversitetit mikologjik të vendit.
Procesi përfshiu gjetjen e mostrës në natyrë, izolimin e saj, kultivimin për një vit në kushte shtëpiake, vëzhgimin morfologjik dhe ekzaminimin mikroskopik, deri te analiza e ADN-së.
Përmes projektit “Fungikos Lab” në Gjilan, synohet që kërkimet të vazhdojnë me studime të tjera gjenetike dhe filogjenetike, ndërsa në të ardhmen shqyrtohet edhe mundësia e kultivimit të kërpudhës për tregun vendor dhe atë të jashtëm.
Jakupi ka bërë të ditur se puna mund të shërbejë si bazë për procedura të mëtejshme shkencore dhe administrative, me synimin që linja e dokumentuar të marrë njohje zyrtare dhe të shqyrtohet mundësia e patentimit.
Një tjetër synim është përfshirja e kërpudhës në zinxhirin ushqimor vendor, si produkt bujqësor me potencial ekonomik.
Ky rezultat mund të krijojë mundësi të reja për zhvillimin e mikologjisë së aplikuar në Kosovë, megjithëse njohja zyrtare dhe patentimi i linjës kërkojnë procedura të mëtejshme./albinfo.ch
