Sipas një studimi të porositur nga autoritetet federale zvicerane, humbjet vjetore në turizmin dimëror mund të tejkalojnë dy miliardë franga zvicerane.
Studimi vlerëson se vendpushimet e skive në lartësi më të ulëta, rreth 1.500 deri në 1.800 metra mbi nivelin e detit, mund të detyrohen të mbyllen për shkak të mungesës së borës, edhe në skenarin më optimist klimatik.
Përballë këtyre sfidave, investimet në përshtatjen ndaj ndryshimeve klimatike mund të ndihmojnë në kufizimin e dëmeve. Në bujqësi, humbjet ekonomike mund të mbahen në nivele të ulëta përmes investimeve në ujitje, me kusht që të ketë ujë të mjaftueshëm.
Ndërkaq, prodhimi i energjisë elektrike nga hidrocentralet mund të shënojë një rritje të lehtë, megjithëse sektori do të duhet të investojë për t’u përballur me reshjet intensive dhe ndryshimin e regjimit të reshjeve.
Studimi, i realizuar në bazë të tri skenarëve klimatikë, shqyrton pesë rreziqe kryesore: temperaturat e larta, thatësirat, ngritjen e kufirit të borës, reshjet intensive dhe stuhitë me breshër.
Autorët theksojnë se kostot e përgjithshme mund të jenë edhe më të larta, pasi analiza nuk përfshin të gjitha rreziqet klimatike dhe ndërveprimet ndërmjet tyre.
Përfundimi i studimit është se përshtatja ndaj ndryshimeve klimatike mund t’i kufizojë humbjet ekonomike, por nuk do të mund t’i parandalojë të gjitha dëmet, veçanërisht në zonat e skive në lartësi të ulëta.
