Berni dhe Obwaldeni nuk do të kontribuojnë në financimin e udhëtimeve falas me transport publik për skijuesit që përdorin Magic Pass.
Projekti synon të inkurajojë udhëtimin drejt qendrave të skijimit pa vetura, duke u ofruar mbajtësve të Magic Pass pesë udhëtime falas me transport publik gjatë sezonit dimëror.
Sipas transmetuesit publik zviceran RTS, kantonet Vaud dhe Valais kanë zotuar gjithsej 430 mijë franga për këtë nismë, ndërsa Berni dhe Obwaldeni kanë refuzuar të marrin pjesë në financim.
Autoritetet e dy kantoneve e arsyetojnë vendimin me kufizimet ligjore dhe nevojën për të garantuar konkurrencë të drejtë ndërmjet destinacioneve turistike.
Megjithatë, projekti do të vazhdojë. Në mungesë të financimit nga këto dy kantone, operatorët e teleferikëve partnerë të Magic Pass mund të mbulojnë diferencën.
Organizatorët synojnë që kjo ofertë e re të përfshijë rreth 100 mijë udhëtime me transport publik gjatë sezonit të ardhshëm dimëror.
