Mërgata shqiptare që dërgon para drejt Kosovës pritet të përfitojë nga ulja e kostove të transfertave bankare, nëse Kosova integrohet në Zonën e Vetme të Pagesave në Euro (SEPA), transmeton albinfo.ch.
Kryeministri i Kosovës, Albin Kurti, ka bërë të ditur se Kuvendi e ka miratuar në lexim të dytë ndryshimin dhe plotësimin e Ligjit për Parandalimin e Pastrimit të Parave dhe Luftimin e Financimit të Terrorizmit. Sipas tij, me këtë vendim përmbushet kushti i fundit ligjor për integrimin e Kosovës në sistemin evropian të pagesave.
Përmes një postimi në Facebook, Kurti ka falënderuar deputetët që votuan ndryshimet ligjore, duke theksuar përfitimet që ky proces pritet t’u sjellë qytetarëve, bizneseve dhe bashkatdhetarëve që jetojnë jashtë vendit.
“Ky integrim mundëson transferta bankare të parave me kosto shumë më të ulët dhe do t’u kursejë qytetarëve, bizneseve e mërgatës tonë rreth 58 milionë euro në vit nga tarifat e transfertave bankare”, ka shkruar Kurti.
Anëtarësimi në SEPA synon t’i bëjë transfertat në euro mes vendeve pjesëmarrëse më të lehta, më të shpejta dhe më të përballueshme. Për mërgatën kosovare, e cila dërgon rregullisht mjete financiare për familjet në vendlindje, ulja e tarifave do të nënkuptonte më shumë para që arrijnë te familjarët dhe më pak shpenzime për dërgimin e tyre.
Megjithatë, përfitimet konkrete do të varen nga përfundimi i procesit të anëtarësimit dhe zbatimi i kushteve përkatëse nga institucionet dhe sektori bankar./Albinfo.ch
