Më 25 tetor, ditën e diel, do të përfundojë ora verore dhe do të hyjë në fuqi ora dimërore. Ndërrimi do të bëhet në orën 03:00 të mëngjesit, kur akrepat e orës do të kthehen 60 minuta prapa.
Çështja e ndryshimit sezonal të orës është diskutuar prej vitesh në Bashkimin Evropian. Në vitin 2018, Komisioni Evropian organizoi një konsultim publik për mundësinë e eliminimit të kësaj praktike, ku morën pjesë rreth 4.6 milionë qytetarë. Rreth 84 për qind e pjesëmarrësve u shprehën pro heqjes së ndërrimit të orës, por vendet anëtare nuk arritën të bien dakord nëse duhet të ruhej përgjithmonë ora verore apo ajo dimërore. Për këtë arsye, propozimi nuk u zbatua dhe ndërrimi sezonal vazhdon edhe sot.
Ndryshe nga shumica e vendeve evropiane, disa shtete të botës nuk e ndryshojnë orën gjatë vitit. Në Azi, Kina, India, Japonia, Koreja e Jugut, Tajlanda, Vietnami, Indonezia, Malajzia dhe Singapori nuk zbatojnë orën verore. Kina e ndërpreu këtë praktikë në vitin 1991.
Edhe disa vende të Lindjes së Mesme, si Arabia Saudite, Emiratet e Bashkuara Arabe, Katari, Kuvajti dhe Bahreini, e mbajnë të njëjtën orë gjatë gjithë vitit. Irani e hoqi ndërrimin sezonal në vitin 2022, ndërsa që nga viti 2023 nuk e ndryshon më orën mes stinëve.
Në Amerikën e Jugut, Brazili, Argjentina, Kolumbia, Peruja dhe Ekuadori gjithashtu nuk e përdorin sistemin e orës verore.
Ndërkohë, në Australi, zbatimi i këtij sistemi varet nga shteti ose territori. Uellsi i Ri Jugor, Viktoria, Australia Jugore, Tasmania dhe Territori i Kryeqytetit Australian kalojnë në orën verore, ndërsa Queensland, Australia Perëndimore dhe Territori Verior nuk e ndryshojnë orën.
Ndër arsyet që përmenden në favor të heqjes së ndryshimit sezonal të orës janë thjeshtimi i përditshmërisë, shmangia e vështirësive teknike në sistemet kompjuterike, transport dhe sektorin e biznesit. Një tjetër faktor është se në zonat pranë ekuatorit, kohëzgjatja e ditës dhe e natës ndryshon shumë pak gjatë vitit, duke e bërë më pak të nevojshëm këtë sistem.
