Presidentja e Kosovës, Justina Shiroka-Pula, ka zhvilluar një takim me përfaqësuesit e Listës “Koalicioni Shqiptar” nga Presheva, Bujanoci dhe Medvegja, të cilët e uruan për marrjen e detyrës së presidentes.
Gjatë takimit, ajo përshëndeti bashkimin e tetë subjekteve politike shqiptare në një listë të përbashkët, me të cilën do të garojnë në zgjedhjet e jashtëzakonshme parlamentare në Serbi, që do të mbahen më 25 tetor.
Shiroka-Pula u dëshiroi sukses përfaqësuesve shqiptarë në këtë proces zgjedhor, duke theksuar se bashkëpunimi dhe koordinimi politik janë thelbësore për rritjen e përfaqësimit të shqiptarëve në institucionet shtetërore të Serbisë.
Sipas njoftimit, presidentja vlerësoi se një përfaqësim më i madh në Kuvendin e Serbisë do t’u mundësonte shqiptarëve të Luginës së Preshevës të ngrinin më fuqishëm çështjet që lidhen me shkeljen e të drejtave të tyre dhe të kërkonin zgjidhje institucionale për kërkesat e tyre legjitime.
Në përfundim të takimit, Shiroka-Pula bëri thirrje për pjesëmarrje sa më të gjerë të shqiptarëve në zgjedhjet e 25 tetorit, duke nënvizuar rëndësinë e votës për forcimin e zërit dhe përfaqësimit të tyre në Kuvendin e Serbisë.
