Ministri i Shëndetësisë, Arben Vitia, ka zhvilluar një takim me ambasadoren e re të Zvicrës në Kosovë, Anne-Lise Cattin Hennin, me rastin e marrjes së detyrës së saj diplomatike.
Gjatë takimit, Vitia e ka uruar ambasadoren për fillimin e mandatit dhe ka falënderuar Qeverinë zvicerane, si dhe Agjencinë Zvicerane për Zhvillim dhe Bashkëpunim (SDC), për përkrahjen e vazhdueshme në zhvillimin dhe avancimin e sistemit shëndetësor në Kosovë.
Sipas njoftimit të Ministrisë së Shëndetësisë, palët kanë diskutuar për rezultatet e bashkëpunimit ndërmjet dy shteteve, duke u fokusuar veçanërisht në projektet AQH dhe IHS. Këto projekte kanë ndihmuar në rritjen e cilësisë së shërbimeve shëndetësore, zhvillimin e aftësive profesionale të stafit mjekësor dhe përmirësimin e kujdesit shëndetësor parësor dhe spitalor.
Ministri Vitia ka ritheksuar përkushtimin e tij për zgjerimin e bashkëpunimit me Zvicrën, me qëllim të përmirësimit të mëtejshëm të shërbimeve shëndetësore dhe ofrimit të kujdesit më cilësor për qytetarët e Kosovës.
