Dokumentari “Voice of My People”, që sjell historinë e veçantë politike dhe personale të Islam Alijajt, tashmë është i disponueshëm në format digjital për publikun në Zvicër dhe Gjermani.
Për të gjithë ata që duan ta ndjekin dokumentarin, “Voice of My People” është tashmë i disponueshëm në format digjital dhe mund të shkarkohet përmes këtij linku: ascotelite.cmail20.com/t/d-e-wwurjk-l-f/
Filmi, i cili pati premierën botërore në Zurich Film Festival 2025, ndjek nga afër rrugëtimin e Alijajt në një prej fushatave më të pazakonta politike në Zvicër, duke dokumentuar kandidaturën e tij për Këshillin Kombëtar dhe mobilizimin e një ekipi të gjerë mbështetësish rreth tij.
Islam Alijaj, politikan zviceran me prejardhje shqiptare, jeton me paralizë cerebrale dhe përdor karrocë, ndërsa për shkak të vështirësive të theksuara në të folur mbështetet edhe në asistencë për komunikim. Megjithatë, pengesat fizike dhe një pozitë jo e favorshme në listat zgjedhore nuk e kanë ndalur ambicien e tij politike.
Në vitin 2022 ai arriti të zgjidhej në Këshillin e Qytetit të Cyrihut, pavarësisht se pozita në listën e partisë nuk e favorizonte një rezultat të tillë. Më pas, synimi u bë edhe më i madh: një vend në Këshillin Kombëtar të Zvicrës.
Pikërisht kjo përpjekje është në qendër të “Voice of My People”.
Dokumentari me regji nga Lorenzo Oschwald, Ansgar Wörner dhe Nico Gerspacher nuk rrëfen vetëm një histori individuale suksesi. Ai hap edhe një diskutim më të gjerë për përfaqësimin politik të personave me aftësi të kufizuara dhe të pakicave, si dhe për barrierat që vazhdojnë të ekzistojnë në pjesëmarrjen e tyre në jetën publike.
Përmes kamerës, publiku futet edhe në prapaskenat e fushatës zgjedhore zvicerane: organizimin, takimet, përpjekjet e ekipit dhe momentet kur një kandidaturë që në letër dukej pak premtuese fillon të marrë një tjetër dimension.
Produksioni i pavarur është financuar përmes crowdfunding-ut dhe sponsorëve. Xhirimet kanë zgjatur më shumë se një vit dhe gjatë këtij procesi janë realizuar mbi 100 orë material filmik. Muzika është kompozuar nga Leonard Küssner, i cili më herët ka bashkëpunuar edhe me regjisorin Wim Wenders.
“Voice of My People” zgjat 84 minuta, ndërsa Ascot Elite Entertainment e ka publikuar në format digjital që nga 8 tetori 2026.
Me kalimin në streaming dhe shpërndarjen digjitale në Zvicër dhe Gjermani, historia e Islam Alijajt tashmë ka mundësi të arrijë një publik shumë më të gjerë. Është një histori politike, por në thelb edhe një histori për përfaqësimin, këmbënguljen dhe të drejtën për të pasur zë aty ku merren vendimet.
