Tre ditë para zgjedhjeve parlamentare në Serbi, “Koalicioni Shqiptar” hyn në garë me një përfaqësim që këtë herë shtrihet edhe në Pazarin e Ri. Mes kandidatëve është edhe Amina Nuraj, e cila sjell në listë zërin e shqiptarëve të Sanxhakut.
Në një prononcim për albinfo.ch, Nuraj ka theksuar rëndësinë e daljes në votime dhe të një përfaqësimi sa më të gjerë politik të shqiptarëve në Serbi.
“Sa më e madhe të jetë pjesëmarrja, aq më i fuqishëm do të jetë zëri ynë. Ky zë duhet të dëgjohet jo vetëm në Serbi, por edhe më gjerë”, është shprehur ajo për albinfo.ch.
Nuraj u është drejtuar shqiptarëve në Sanxhak, Preshevë, Bujanoc, Medvegjë dhe në pjesë të tjera të Serbisë, duke kërkuar që të shfrytëzojnë të drejtën e votës më 25 tetor.
“U bëj thirrje të gjithë qytetarëve që posedojnë dokumente të vlefshme dhe kanë të drejtë vote që më 25 tetor të dalin dhe ta ushtrojnë të drejtën e tyre demokratike”, ka deklaruar Nuraj.
Për të, rëndësia e kësaj kandidature lidhet edhe me faktin se shqiptarët e Sanxhakut përfshihen drejtpërdrejt në një listë të përbashkët shqiptare.
“I ftoj shqiptarët në Sanxhak, Preshevë, Bujanoc, Medvegjë dhe në gjithë Serbinë që të bashkohen rreth një qëllimi të përbashkët: avancimit të të drejtave themelore, përfaqësimit politik dhe dinjitetit të shqiptarëve”, është shprehur ajo.
Nuraj ka falënderuar gjithashtu mbështetësit e saj për përkrahjen gjatë fushatës, si në rrjetet sociale, ashtu edhe në kontaktet e drejtpërdrejta.
“Ju falënderoj nga zemra për çdo mbështetje, për çdo fjalë të mirë dhe përkrahje që më keni dhënë”, ka thënë ajo.
Me kandidaturën e Amina Nurajt, përfaqësimi shqiptar në këtë garë nuk mbetet vetëm në Preshevë, Bujanoc dhe Medvegjë, por përfshin edhe Pazarin e Ri dhe shqiptarët e Sanxhakut.
Zgjedhjet e parakohshme parlamentare në Serbi do të mbahen më 25 tetor.
