Kosova vazhdon të ketë një diferencë të theksuar mes vlerës së mallrave që eksporton dhe atyre që importon. Gjatë shtatorit 2026, vendi eksportoi mallra në vlerë prej 109,4 milionë eurosh, ndërsa importet arritën në 643,4 milionë euro, transmeton albinfo.ch.
Sipas të dhënave të publikuara nga Agjencia e Statistikave të Kosovës (ASK), eksportet shënuan rritje prej 27,5 për qind krahasuar me shtatorin e vitit 2025, kur vlera e tyre ishte 85,8 milionë euro.
Edhe importet shënuan rritje, por më të ngadaltë. Në shtator të këtij viti, ato ishin 6,1 për qind më të larta se në të njëjtën periudhë të vitit të kaluar, kur kishin arritur në 606,2 milionë euro.
Pavarësisht rritjes së eksporteve, diferenca mes importeve dhe eksporteve mbetet e madhe. Deficiti tregtar në shtator arriti në 534 milionë euro, krahasuar me 520,5 milionë euro në shtatorin e vitit 2025, duke shënuar rritje prej rreth 2,6 për qind.
Të dhënat e ASK-së tregojnë se eksportet mbulojnë vetëm 17 për qind të importeve, çka pasqyron varësinë e konsiderueshme të tregut të Kosovës nga mallrat e importuara.
Metalet bazë dominojnë eksportet
Sa u përket kategorive të mallrave të eksportuara, pjesën më të madhe e përbëjnë metalet bazë dhe artikujt prej tyre, me 24,3 për qind të totalit.
Në vendin e dytë renditen produktet minerale, me 17,1 për qind, ndërsa plastika, goma dhe artikujt prej tyre përbëjnë 10,3 për qind. Ushqimet e përgatitura, pijet dhe duhani zënë 10,1 për qind të eksporteve.
Në anën e importeve, pjesën më të madhe e përbëjnë produktet minerale, me 19,8 për qind. Pas tyre vijnë ushqimet e përgatitura, pijet dhe duhani, me 11,8 për qind, mjetet e transportit me 11,2 për qind, makineritë dhe pajisjet mekanike e elektrike me 11,1 për qind, si dhe metalet bazë me 10,1 për qind.
CEFTA, tregu kryesor për eksportet e Kosovës
Vendet e CEFTA-s mbeten destinacioni kryesor i mallrave të eksportuara nga Kosova. Gjatë shtatorit, eksportet drejt këtyre vendeve arritën në 55,6 milionë euro, duke përbërë 50,8 për qind të eksporteve të përgjithshme. Krahasuar me shtatorin e vitit 2025, ato u rritën për 36,8 për qind.
Brenda CEFTA-s, Shqipëria ishte partneri kryesor tregtar për eksportet e Kosovës, me 25,3 për qind, e ndjekur nga Maqedonia e Veriut me 13,9 për qind, Mali i Zi me 5 për qind dhe Serbia me 4,5 për qind.
Ndërkohë, eksportet drejt vendeve të Bashkimit Evropian arritën në 34,2 milionë euro, ose 31,3 për qind të eksporteve të përgjithshme. Kjo paraqet rritje prej 22,1 për qind krahasuar me të njëjtin muaj të vitit të kaluar. Gjermania ishte partneri kryesor i Kosovës për eksport brenda BE-së, me 9,8 për qind.
Sa u përket importeve, nga vendet e Bashkimit Evropian Kosova importoi mallra në vlerë prej rreth 281 milionë eurosh, që përbëjnë 43,7 për qind të importeve të përgjithshme. Krahasuar me shtatorin e vitit 2025, importet nga ky grup vendesh u rritën për 12,7 për qind.
Të dhënat e shtatorit tregojnë se, ndonëse eksportet e Kosovës kanë shënuar rritje vjetore më të madhe se importet, vendi vazhdon të përballet me një deficit të lartë tregtar dhe me mbulim të ulët të importeve përmes eksporteve./Albinfo.ch
