Për gati tri dekada, Zvicra ka qenë partnere e Kosovës në përmirësimin e sektorit të ujërave, forcimin e institucioneve dhe avancimin e shërbimeve të furnizimit me ujë. Ky bashkëpunim u rikujtua nga ambasadorja zvicerane në Kosovë, Anne-Lise Cattin Hennin, gjatë hapjes së Konferencës dhe Ekspozitës së 14-të të Përbashkët të Ballkanit, e cila këtë vit po mbahet në Prishtinë me temën “Uji dhe mundësitë e barabarta”, transmeton albinfo.ch.
Në fjalën e saj, ambasadorja theksoi se uji është shumë më tepër se një burim natyror, pasi lidhet drejtpërdrejt me shëndetin, jetesën dhe mundësitë e barabarta për qytetarët. Ajo nënvizoi rëndësinë e sigurimit të shërbimeve të besueshme të furnizimit me ujë, kanalizimit adekuat dhe përfshirjes së qytetarëve në vendimmarrjen për menaxhimin e këtyre burimeve.
Sipas ambasadores, menaxhimi i drejtë dhe i qëndrueshëm i ujit është përgjegjësi e përbashkët, që kërkon bashkëpunim mes institucioneve dhe komuniteteve.
Zvicra ka bërë të ditur se mbetet e përkushtuar për vazhdimin e partneritetit me Kosovën, duke mbështetur përpjekjet për përmirësimin e shërbimeve dhe mbrojtjen e burimeve ujore edhe në vitet në vijim./Albinfo.ch
