Komisioni Evropian do të miratojë dhe publikojë sot Paketën e Zgjerimit, së bashku me raportet vjetore të progresit për vendet që synojnë anëtarësimin në Bashkimin Evropian, përcjell albinfo.ch.?
Sipas informacioneve të publikuara paraprakisht për përmbajtjen e draft-raportit, Kosova pritet të renditet në mesin e vendeve që nuk kanë shënuar përparim ose kanë shënuar përparim të kufizuar në fushat kryesore të reformave.
Kriza e zgjatur politike dhe bllokada institucionale, që kanë penguar funksionimin e Kuvendit dhe punën e institucioneve, konsiderohen ndër arsyet kryesore të ngecjes së vendit në rrugën drejt BE-së.
Vëmendje e veçantë pritet t’i kushtohet edhe sundimit të ligjit, ku raporti evidenton mungesë të përparimit të mjaftueshëm, si dhe shqetësime lidhur me ndikimin e politikës dhe grupeve të interesit në sistemin gjyqësor dhe prokurorial.
Raporti pritet të përfshijë edhe vlerësimin për përafrimin e Kosovës me politikën e jashtme dhe të sigurisë së Bashkimit Evropian, ku vendi ka ruajtur përputhje të plotë me qëndrimet e BE-së.
Një pjesë e rëndësishme e dokumentit i kushtohet edhe dialogut për normalizimin e marrëdhënieve ndërmjet Kosovës dhe Serbisë, si dhe zbatimit të marrëveshjeve të arritura në kuadër të këtij procesi.
Vlerësimi përfundimtar i Komisionit Evropian do të bëhet publik gjatë ditës, në kuadër të Paketës së Zgjerimit për vitin 2026./Albinfo.ch
