Kosova ka shënuar përparim në luftën kundër krimit të organizuar, veçanërisht në forcimin e kapaciteteve të Policisë dhe zgjerimin e bashkëpunimit me institucionet ndërkombëtare. Megjithatë, sfida të rëndësishme mbeten në bashkëpunimin ndërmjet Policisë dhe Prokurorisë, konfiskimin e pasurisë së paligjshme dhe përdorimin e teknologjisë në hetime, përcjell albinfo.ch.
Në Raportin për Kosovën 2026, Komisioni Evropian vlerëson se vendi ka shënuar “disa përparime” në këtë fushë. Ndër zhvillimet kryesore përmendet dyfishimi i strukturave të inteligjencës në Policinë e Kosovës, si në nivel qendror, ashtu edhe në atë lokal. Ky ndryshim ka ndihmuar në rritjen e kapaciteteve analitike dhe identifikimin më të mirë të rrjeteve kriminale.
Raporti evidenton gjithashtu miratimin e disa dokumenteve strategjike për zhvillimin e Policisë, policimin e bazuar në inteligjencë dhe menaxhimin e burimeve njerëzore.
Përparim është shënuar edhe në bashkëpunimin ndërkombëtar. Nga viti 2022 deri më 2025, komunikimet operative policore janë rritur mesatarisht për 25 për qind në vit. Kosova ka marrëveshje për bashkëpunim policor me shtatë shtete anëtare të BE-së, ndërsa shkëmben informacione me 12 shtete të tjera përmes rrjetit SIENA të EUROPOL-it.
Vetëm gjatë vitit 2025, Policia e Kosovës ka marrë pjesë në 12 plane operative dhe 72 aksione në kuadër të platformës evropiane EMPACT. Ndërkohë, për periudhën 2026–2027, Kosova është bashkëudhëheqëse në dy aksione që lidhen me luftimin e krimit kibernetik dhe kontrabandimin e migrantëve.
Megjithatë, Komisioni Evropian tërheq vërejtjen për disa mangësi që kërkojnë vëmendje. Një prej tyre është dallimi i madh ndërmjet vlerës së pasurisë së sekuestruar dhe asaj të konfiskuar përfundimisht. Gjatë vitit 2025, autoritetet kanë sekuestruar pasuri në vlerë prej rreth 64 milionë eurosh, por vlera e konfiskimeve përfundimtare ka arritur vetëm në rreth 566 mijë euro.
Raporti nënvizon gjithashtu nevojën për bashkëpunim më të ngushtë ndërmjet Policisë dhe Prokurorisë, ruajtjen e pavarësisë operative të Policisë dhe pajisjen e institucioneve me mjete moderne teknologjike për hetimin e grupeve kriminale.
Si pengesë për bashkëpunimin global përmendet edhe mosanëtarësimi i Kosovës në INTERPOL, që kufizon mundësitë e pjesëmarrjes së plotë në mekanizmat ndërkombëtarë të luftimit të krimit.
Në vlerësimin përfundimtar, Komisioni Evropian thekson se përparimi i arritur duhet të shoqërohet me rezultate më konkrete në hetimin e rrjeteve kriminale, bashkëpunimin ndërinstitucional dhe konfiskimin e pasurisë që buron nga aktivitetet e paligjshme./Albinfo.ch
