Një aksident i rëndë trafiku ka ndodhur të premten në mëngjes në lindje të Francës, ku një autobus që transportonte nxënës ka dalë nga rruga dhe është përplasur me një pemë. Sipas raportimeve fillestare, aksidenti ka shkaktuar disa viktima, përcjell albinfo.ch.
Ngjarja ka ndodhur në qytetin Lent, në verilindje të Lionit, rreth 55 kilometra larg kufirit me Zvicrën.
Sipas kryetarit të qytetit, Yves Cristin, autobusi ka dalë nga rruga dhe është përplasur me një pemë, duke përfunduar në një kanal anësor. Aksidenti ka ndodhur rreth orës 7:30, në një autobus të linjës ndërurbane që qarkullonte në drejtimin Lion–Bourg-en-Bresse dhe transportonte, krahas udhëtarëve të tjerë, edhe rreth 15 nxënës.
Bilanci fillestar i autoriteteve bën të ditur se dy persona kanë humbur jetën, një i mitur dhe një 18-vjeçar, ndërsa 16 të tjerë kanë mbetur të lënduar. Tre prej tyre janë në gjendje të rëndë.
Në vendin e ngjarjes janë angazhuar ekipe të shumta të emergjencës, forca policore dhe dy helikopterë për transportimin e të lënduarve. Autoritetet kanë aktivizuar gjithashtu planin e reagimit emergjent dhe kanë kërkuar nga qytetarët të shmangin zonën ku ka ndodhur aksidenti.
Ministri francez i Arsimit, Édouard Geffray, ka shprehur ngushëllimet për familjet e viktimave dhe solidaritetin me nxënësit e prekur nga aksidenti. Ndërkohë, autoritetet kanë nisur hetimet për të përcaktuar shkaqet e daljes së autobusit nga rruga. /Albinfo.ch
