Ministria e Industrisë, Ndërmarrësisë, Tregtisë dhe Inovacionit dhe Banka Botërore kanë nënshkruar marrëveshje bashkëpunimi për zhvillimin e Eko-Parqeve Industriale në Kosovë, me synim krijimin e kushteve për zgjerimin e kapaciteteve prodhuese vendore dhe rritjen e konkurrueshmërisë së bizneseve, transmeton albinfo.ch.
Projekti parasheh zhvillimin e zonave industriale sipas standardeve mjedisore dhe ndërkombëtare, duke synuar njëkohësisht tërheqjen e investimeve, rritjen e prodhimit dhe hapjen e vendeve të reja të punës.
Kryeministri i Kosovës, Albin Kurti, gjatë prezantimit të marrëveshjes, tha se zhvillimi i parqeve industriale është një prej mekanizmave për të adresuar deficitin tregtar të vendit.
Sipas tij, gjatë vitit 2025 Kosova importoi mallra në vlerë prej rreth shtatë miliardë eurosh, ndërsa eksportet arritën në vetëm rreth një miliard euro. Kurti theksoi se synimi është që një pjesë e produkteve që aktualisht importohen të prodhohen brenda vendit, duke krijuar mundësi më të mira për bizneset vendore dhe investitorët e huaj.
Ai bëri të ditur se zhvillimi i parqeve industriale do të përfshijë të gjitha rajonet e Kosovës, pa përjashtim, përfshirë edhe dy parqe në pjesën veriore të vendit.
“Zhvillimi i parqeve industriale do të shtrihet në të gjitha rajonet e Kosovës pa përjashtim, përfshirë edhe dy parqe në pjesën veriore të vendit tonë. Pas vendosjes së rendit dhe ligjit në veri të Ibrit, po e zhvendosim gradualisht vëmendjen drejt zhvillimit ekonomik, krijimit të vendeve të punës dhe përmirësimit të jetës së qytetarëve që jetojnë atje”, deklaroi Kurti.
Ndërkaq, ministrja e Industrisë, Ndërmarrësisë dhe Tregtisë, Mimoza Kusari-Lila, e cilësoi marrëveshjen si një hap të ri drejt zbatimit të standardeve ndërkombëtare për eko-zonat industriale.
Ajo theksoi se industria moderne nuk duhet të vlerësohet vetëm në bazë të sasisë së prodhimit, por edhe përmes mënyrës së prodhimit, efikasitetit në shfrytëzimin e burimeve dhe ndikimit në mjedis e shoqëri.
Kusari-Lila iu referua edhe një raporti të Korporatës Financiare Ndërkombëtare (IFC), i cili identifikon prodhimin e komponentëve të ndërtimit si një sektor me potencial të veçantë për ekonominë e Kosovës. Në këtë fushë përfshihen përpunimi i metaleve, prodhimi i dyerve dhe dritareve, mobilieve, materialeve izoluese dhe sistemeve të ngrohjes.
Sipas saj, eko-zonat industriale synojnë të shërbejnë si instrument për mobilizimin e investimeve private dhe krijimin e vendeve të reja të punës.
Mbështetjen për këtë koncept e shprehu edhe Bashkimi Evropian. Shefi i Bashkëpunimit të BE-së në Kosovë, Hubert Perr, vlerësoi se parqet industriale krijojnë mundësi për zhvillimin e një ekonomie më të qëndrueshme dhe konkurruese.
Ai theksoi se ky model i zhvillimit industrial po promovohet edhe në vendet e Bashkimit Evropian, duke nënvizuar rëndësinë e tij për të ardhmen ekonomike.
Në anën tjetër, menaxherja e Bankës Botërore për Kosovën dhe Maqedoninë e Veriut, Carole Megevand, tha se përmes zhvillimit të eko-parqeve industriale synohet të adresohen disa prej pengesave me të cilat përballen bizneset, veçanërisht në menaxhimin dhe shfrytëzimin efikas të burimeve natyrore.
Ajo përmendi energjinë, ujin dhe menaxhimin e mbeturinave si fusha ku zbatimi i këtij modeli mund të ndihmojë në rritjen e efikasitetit dhe përmbushjen e kritereve të tregut të Bashkimit Evropian.
Sipas Megevand, projekti nuk synon vetëm zëvendësimin e produkteve të importuara, por edhe rritjen e potencialit eksportues të Kosovës dhe fuqizimin e identitetit të produkteve vendore në tregjet ndërkombëtare përmes etiketimit “Made in Kosovo”./Albinfo.ch
