Një person me inicialet A.G. është arrestuar në Suedi, ndërsa në Kosovë janë sekuestruar pasuritë që dyshohet se janë përfituar përmes veprimtarive kriminale, në kuadër të një hetimi për trafikim të narkotikëve dhe shpëlarje të parave, transmeton albinfo.ch.
Lajmi është bërë i ditur nga Zyra e Kryeprokurorit të Shtetit, e cila ka njoftuar se operacioni është rezultat i bashkëpunimit ndërmjet Prokurorisë Speciale të Kosovës dhe autoriteteve suedeze.
Sipas njoftimit, arrestimi dhe sekuestrimi i pasurive janë realizuar pas veprimeve hetimore të ndërmarra nga Prokuroria Speciale e Kosovës, në bashkëpunim me institucionet përkatëse suedeze.
Autoritetet e kanë cilësuar rastin si precedent të parë, pasi sipas tyre, autoritetet suedeze kanë arritur të sekuestrojnë pasuri që ndodhen jashtë juridiksionit të tyre territorial.
Zyra për Rikthimin e Aseteve, në kuadër të Zyrës së Kryeprokurorit të Shtetit, në bashkëpunim me autoritetet suedeze, pritet të ndërmarrë hapat e mëtejshëm për ekzekutimin përfundimtar të vendimit për konfiskimin e pasurive në Kosovë.
Ky rast, sipas institucioneve, dëshmon rëndësinë e bashkëpunimit ndërkombëtar në luftimin e krimit të organizuar, veçanërisht në identifikimin dhe sekuestrimin e pasurive që dyshohet se burojnë nga aktivitetet kriminale, edhe kur ato ndodhen jashtë shtetit ku zhvillohen hetimet.
Në njoftimin zyrtar nuk janë dhënë detaje për identitetin e plotë të personit të arrestuar, lidhjen e tij me Kosovën apo vlerën dhe llojin e pasurive të sekuestruara./Albinfo.ch
