Marrja e patentë-shoferit në Gjermani pritet të bëhet më e lirë dhe më fleksibile, pas miratimit të ndryshimeve në ligjin për patentat e shoferëve nga Bundestagu gjerman, përcjell albinfo.ch.
Aktualisht, marrja e patentës së kategorisë B kushton mesatarisht rreth 3.400 euro. Me reformën e re, kandidatët pritet të kursejnë disa qindra euro, ndërsa në rrethana të caktuara kursimi mund të arrijë deri në 1.000 euro, sipas vlerësimeve të qeverisë gjermane.
Një nga ndryshimet kryesore lidhet me mësimin teorik. Në të ardhmen, ndjekja fizike e të gjitha orëve nuk do të jetë më e detyrueshme në formën aktuale, pasi autoshkollat do të kenë mundësi të ofrojnë më shumë përmbajtje përmes platformave online dhe aplikacioneve digjitale.
Reforma prek edhe përgatitjen praktike. Deri më tani, kandidatët për kategorinë B duhet të kryenin 12 vozitje të posaçme, të cilat përfshinin udhëtimet jashtë zonave urbane, autostradën dhe vozitjen gjatë natës.
Me rregullat e reja, nuk do të ketë më një numër të përcaktuar paraprakisht të këtyre orëve. Kohëzgjatja e përgatitjes do të përshtatet sipas aftësive të kandidatit dhe vlerësimit të instruktorit.
Një tjetër lehtësi e paraparë është mundësia që kandidatët, pasi të kalojnë provimin teorik dhe të përfundojnë së paku gjashtë orë praktike në autoshkollë, të vazhdojnë ushtrimet e vozitjes edhe me persona të afërt, përfshirë prindërit, nëse plotësojnë kushtet ligjore.
Qeveria gjermane synon që përmes këtyre ndryshimeve të modernizojë sistemin e aftësimit të shoferëve, të lehtësojë qasjen në mësim dhe, mbi të gjitha, të ulë shpenzimet për marrjen e patentë-shoferit.
Ndryshimet pritet të hyjnë në fuqi gjatë vitit 2027, ndërsa data e saktë e zbatimit ende nuk është përcaktuar. /Albinfo.ch
