Thinking Machines Lab, kompania e inteligjencës artificiale e themeluar nga shqiptarja Mira Murati, është pranë sigurimit të 5 miliardë dollarëve në një raund të ri financimi, që do ta vlerësonte kompaninë në 40 miliardë dollarë para investimit, transmeton albinfo.ch.
Sipas Business Insider, duke iu referuar burimeve të njohura me negociatat, raundi i ri i financimit mund të përmbyllet së shpejti dhe pritet të udhëhiqet nga fondi investues Accel.
Nëse marrëveshja finalizohet sipas kushteve të raportuara, vlerësimi i Thinking Machines Lab do të arrinte në rreth 45 miliardë dollarë pas investimit.
Kompania kishte siguruar më parë 2 miliardë dollarë në një raund fillestar financimi gjatë vitit 2025, duke arritur një vlerësim prej më shumë se 10 miliardë dollarësh, ende pa prezantuar produktin e saj të parë.
Raundi i ri do të përfaqësonte një rritje më shumë se trefish të vlerësimit krahasuar me financimin e fundit të bërë publik, duke reflektuar interesimin e investitorëve për kompanitë që zhvillojnë teknologji të inteligjencës artificiale, pavarësisht kostove të larta dhe konkurrencës për talentet në këtë sektor.
Më herët, kompania kishte zhvilluar negociata për financim mbi bazën e një vlerësimi prej 50 miliardë dollarësh, por ato bisedime nuk u përmbyllën.
Mira Murati, ish-drejtuese e teknologjisë në OpenAI, themeloi Thinking Machines Lab në vitin 2025, duke mbledhur rreth vetes një ekip studiuesish dhe inxhinierësh, disa prej të cilëve kishin kontribuar në zhvillimin e modeleve të para të ChatGPT.
Produkti i parë i kompanisë, Tinker, u mundëson zhvilluesve të përshtatin modele të mëdha gjuhësore për nevoja dhe aplikime specifike.
Ndërkohë, të enjten, kompania publikoi një version të ri të produktit, duke raportuar përmirësime në aftësitë e kodimit përmes inteligjencës artificiale.
