Imami i Wetzikonit në Zvicër, Bashkim Aliu, ka dhënë dorëheqje nga pozitat që mbante në organizatat islame, pas një serie hulumtimesh gazetareske të publikuara nga mediat e grupit Tamedia, fillimisht nga gazeta Tages-Anzeiger.
Hulumtimet kanë nxjerrë në pah deklarata të tij me përmbajtje homofobike në rrjetet sociale, si dhe pjesëmarrjen në një konferencë të organizuar në Doha, e cila lidhet me organizatën Vëllazëria Myslimane.
Aliu për një kohë të gjatë është konsideruar si një figurë e rëndësishme në integrimin e komunitetit mysliman në Zvicër. Ai kishte ardhur në Wetzikon nga Maqedonia e Veriut në vitin 2011. Përmes ligjëratave dhe hytbeve në gjuhën shqipe, të cilat përktheheshin drejtpërdrejt në gjermanisht dhe publikoheshin online, ai kishte arritur të krijonte një audiencë të gjerë, veçanërisht në mesin e të rinjve, transmeton albinfo.ch.
E quajti Paradën e Krenarisë në Prishtinë “paradë të turpit”
Me kalimin e viteve, ndikimi i tij në institucionet islame në Zvicër u rrit. Aliu u bë anëtar i kryesisë së Federatës së Organizatave Ombrellë Islame në Zvicër (FIDS), ndërsa mori edhe drejtimin teologjik të Shoqatës së Organizatave Islame në Cyrih (VIOZ).
Ai gjithashtu mbante kontakte të rregullta me autoritetet e Cyrihut.
Megjithatë, në vitin 2017, Aliu kishte publikuar në Facebook një koment për paradën e parë të Krenarisë (Pride) në Prishtinë, të cilën e kishte cilësuar si “paradë të turpit”.
Në vitin 2024, ai mori pjesë edhe në një takim të Unionit Ndërkombëtar të Dijetarëve Myslimanë në Doha. Kjo organizatë konsiderohet e afërt me Vëllazërinë Myslimane. Në këtë konferencë kishte folur edhe ish-udhëheqësi i Hamasit, Ismail Haniyeh, i cili kishte bërë thirrje për luftë kundër Izraelit.
Miliona franga subvencione nga institucionet zvicerane
Rasti ka ngritur gjithashtu pikëpyetje lidhur me financimin publik të organizatave islame dhe mbikëqyrjen e përdorimit të këtyre mjeteve.
Sipas raportimit të mediave zvicerane, kantoni i Cyrihut i ka ndarë Shoqatës së Organizatave Islame në Cyrih (VIOZ) rreth 2.5 milionë franga zvicerane gjatë periudhës 2017–2025, në kuadër të një projekti për përkujdesje shpirtërore ndaj komunitetit mysliman.
Ndërkohë, qyteti i Cyrihut ka kontribuar me nga 50 mijë franga zvicerane në vit për këtë shërbim.
Në një deklaratë për gazetën NZZ, autoritetet e qytetit të Cyrihut kanë theksuar se i marrin seriozisht akuzat dhe se synojnë të shqyrtojnë mënyrën se si VIOZ e ka trajtuar këtë çështje.
Edhe autoritetet kantonale kanë bërë të ditur se urrejtja, racizmi dhe diskriminimi nuk tolerohen dhe se, në rast të shkeljeve, do të ndërmerren masat përkatëse.
Dorëheqja e Bashkim Aliut vjen në një kohë kur në Zvicër është hapur debat mbi përgjegjësinë e organizatave fetare, qëndrimet publike të përfaqësuesve të tyre dhe përdorimin e fondeve nga taksapaguesit për shërbimet fetare.
