Reagimet ndërkombëtare ndaj synimit të Kuvendit të Kosovës për ta miratuar sërish Ligjin për Gjykatën Speciale janë shtuar, ndërsa përfaqësuesit diplomatikë kanë kërkuar që procesi të mos zhvillohet me ngut dhe pa konsultime paraprake, përcjell albinfo.ch.
Zyra e Bashkimit Evropian në Kosovë ka shprehur shqetësim për ndryshimet e propozuara, duke vënë në pikëpyetje kushtetutshmërinë e tyre dhe duke paralajmëruar se mund të cenohen obligimet ndërkombëtare të Kosovës, pavarësia e gjyqësorit dhe mbrojtjen e viktimave e dëshmitarëve. Qëndrimin e BE-së e ka mbështetur edhe Ambasada e Gjermanisë.
Edhe Ambasada e Italisë ka kundërshtuar miratimin e ligjit në formën aktuale, duke vlerësuar se ai nuk do t’u shërbente as interesave të Kosovës dhe as interesave të personave të dënuar nga Dhomat e Specializuara. Ajo ka shprehur keqardhje për mungesën e konsultimeve paraprake me partnerët ndërkombëtarë.
Ndërkaq, Ambasada e Mbretërisë së Bashkuar ka paralajmëruar se ndryshimet e propozuara mund të dëmtojnë marrëdhëniet e Kosovës me partnerët dhe mbështetësit e saj ndërkombëtarë, ndaj i ka bërë thirrje Kuvendit të mos nxitojë me votimin.
Pavarësisht këtyre paralajmërimeve, Lëvizja Vetëvendosje ka bërë të ditur se do ta mbështesë sërish ligjin në versionin e miratuar më 6 tetor.
Kuvendi i Kosovës tashmë ka votuar për përfshirjen e kësaj çështjeje në rendin e ditës. Për ta rrëzuar veton e presidentes Justina Shiroka-Pula kërkohen të paktën 61 vota. Shqyrtimi dhe votimi i ligjit pritet të zhvillohen të premten, në vazhdimin e seancës plenare./Albinfo.ch/
