Presidentja e Komisionit Evropian, Ursula von der Leyen, ka bërë të ditur se BE-ja është duke përgatitur paketën e 22-të të sanksioneve kundër Rusisë, si dhe një propozim për financimin e Ukrainës në vitin 2027, përcjell albinfo.ch.
Duke folur para gazetarëve në fillim të Samitit të Komunitetit Politik Evropian (EPC), në Dublin, Von der Leyen tha se të dyja propozimet do të paraqiten përpara mbledhjes së ardhshme të Këshillit Evropian.
“Ne do të vijmë me paketën e sanksioneve dhe propozimin për nevojat financiare përpara Këshillit të ardhshëm Evropian”, deklaroi ajo.
Kreu i Komisionit Evropian përshëndeti gjithashtu bisedimet e paqes që po zhvillohen në Abu Dhabi, si dhe përfaqësimin evropian në këto negociata, me qëllim mbrojtjen e interesave të Bashkimit Evropian.
“Ne do ta mbështesim Ukrainën, qoftë në kohë lufte apo në kohë paqeje”, theksoi Von der Leyen. /Albinfo.ch
