Skip to content

Studimi: Gjumi luan rol kyç në zhvillimin dhe trajtimin e depresionit

Foto ilustrim

Studimet e fundit shkencore tregojnë se çrregullimet e gjumit nuk janë vetëm simptomë e depresionit, por mund të ndikojnë edhe në shfaqjen dhe rikthimin e tij.

Sipas një hulumtimi të studiuesve nga Zvicra, cilësia e dobët e gjumit mund të jetë një faktor i rëndësishëm rreziku, veçanërisht te adoleshentët.

Studiuesja Leila Tarokh nga Universiteti i Bernës, përmes matjeve të aktivitetit elektrik të trurit (EEG), ka vërejtur se adoleshentët me depresion shfaqin më pak valë karakteristike të gjumit të thellë dhe më shumë valë që lidhen me gjendjen e zgjimit. Kjo sugjeron se truri i tyre mund të ketë vështirësi për të arritur fazat e gjumit të thellë.

Edhe psikiatri Christoph Nissen nga Spitali Universitar i Gjenevës thekson rëndësinë e trajtimit të çrregullimeve të gjumit si pjesë të trajtimit të depresionit. Sipas tij, përmirësimi i gjumit kërkon ndërhyrje të veçanta psikoterapeutike dhe nuk ndodh domosdoshmërisht me përmirësimin e gjendjes depresive.

Hulumtuesit vlerësojnë se monitorimi i cilësisë së gjumit mund të ndihmojë në identifikimin e personave që kanë nevojë për mbështetje më të afërt, si dhe në parandalimin e zhvillimit ose rikthimit të depresionit.

Megjithëse mekanizmat e saktë të lidhjes mes gjumit dhe depresionit ende po studiohen, ekspertët theksojnë se përmirësimi i gjumit është një element i rëndësishëm në kujdesin ndaj shëndetit mendor.