Skip to content

Kori i Universitetit “Haxhi Zeka” prezanton muzikën shqiptare në Hungari me dy koncerte

Ansambli nga Peja performoi në Pécs dhe Budapest, në bashkëpunim me koret universitare hungareze, duke forcuar lidhjet kulturore dhe akademike ndërmjet dy vendeve.

Kori i Fakultetit të Arteve të Universitetit “Haxhi Zeka” nga Peja ka zhvilluar dy koncerte në Hungari, në kuadër të një bashkëpunimi muzikor me koret e universiteteve hungareze, transmeton albinfo.ch.

Koncerti i parë u mbajt më 17 nëntor 2026, në Aula Magna të Universitetit ELTE në Budapest, ku kori “Béla Bartók” i këtij universiteti, nën drejtimin e profesorit László Kovács, performoi së bashku me Korin e Fakultetit të Arteve të Universitetit “Haxhi Zeka”, të drejtuar nga profesori Hysen Nimani. Në këtë koncert ishte i angazhuar edhe koorepetitori, profesori Gent Kumnova.

Ndërsa më 18 nëntor, në Sallën Ceremoniale të Urdhrit Cistercian në Pécs, u mbajt koncerti i përbashkët me titull “Choral Echoes: From Peja to Pécs”.

Në këtë mbrëmje, kori nga Peja, nën drejtimin e profesorit Hysen Nimani, performoi së bashku me Korin e Universitetit të Pécs-it, të drejtuar nga profesori Tamás Lakner, laureat i Çmimit Liszt.

Dy koncertet u karakterizuan nga bashkëpunimi artistik dhe shkëmbimi kulturor ndërmjet institucioneve universitare të Kosovës dhe Hungarisë. Koncerti në Pécs u mbështet nga Ambasada e Republikës së Kosovës në Hungari.

Për realizimin e këtyre dy mbrëmjeve muzikore është shprehur mirënjohje e veçantë për profesorët Hysen Nimani, Tamás Lakner, László Kovács dhe Gent Kumnova./Albinfo.ch