Rritja e primeve të sigurimit shëndetësor po rëndon buxhetet familjare në Zvicër. Sipas të dhënave të publikuara më 20 nëntor nga Zyra Federale e Statistikave (BFS), indeksi i primeve është rritur me 3,3 për qind gjatë vitit 2026, përcjell albinfo.ch.
Ky indeks përfshin sigurimin bazë të detyrueshëm dhe sigurimet shëndetësore shtesë.
Sipas përllogaritjeve të BFS-së, shtrenjtimi i primeve e ka ulur me 0,2 pikë përqindjeje rritjen e mundshme të të ardhurave mesatare të disponueshme. Nëse primet do të kishin mbetur të pandryshuara, familjet do të kishin pasur më shumë para për shpenzime të tjera ose kursime.
Primet e sigurimit bazë janë rritur mesatarisht me 4,3 për qind krahasuar me vitin 2025. Ndërkohë, ato të sigurimeve shtesë kanë mbetur përgjithësisht të pandryshuara.
Brenda sigurimeve shtesë spitalore ka pasur dallime: primet për repartin e përgjithshëm kanë rënë me 1,2 për qind dhe për repartin privat me 0,5 për qind, ndërsa për repartin gjysmëprivat janë rritur me 0,6 për qind./Albinfo.ch