Sot vazhdon seanca konstituive e Kuvendit, në rend dite zgjedhja e kryetarit dhe nënkryetarëve

Në orën 11:00 pritet të vazhdojë seanca konstituive e legjislaturës së 11-të të Kuvendit të Kosovës, të dalë nga zgjedhjet e 7 qershorit.

Në rendin e ditës janë dy pika: zgjedhja e kryetarit të Kuvendit dhe zgjedhja e nënkryetarëve, përcjell albinfo.ch.

Seanca është thirrur nga kryesuesi Avni Dehari, pasi Kuvendi ka kaluar afatin kushtetues për konstituim. Për këtë situatë, partitë opozitare kanë kritikuar vazhdimisht Deharin dhe Lëvizjen Vetëvendosje, si partia fituese e zgjedhjeve.

Dy herë u tentua konstituimi

Në dy raste të mëparshme, deputetët janë mbledhur për konstituimin e Kuvendit, por kryetari i Vetëvendosjes, Albin Kurti, kishte kërkuar kohë shtesë për të zhvilluar negociata lidhur me çështjen e presidentit.

Kurti kishte argumentuar se pa një marrëveshje për zgjedhjen e presidentit, vendi do të shkonte në zgjedhje të reja.

Ndërkohë, kanë kaluar edhe 30 ditë të tjera nga përfundimi i afatit fillestar kushtetues për konstituimin e Kuvendit.

Marrëveshja VV-LDK për presidentin

Vazhdimi i seancës vjen pas marrëveshjes së arritur mes Vetëvendosjes dhe LDK-së për kandidaturën e Bekim Sejdiut për president.

Megjithatë, gjashtë deputetë të LDK-së kanë shprehur kundërshtim ndaj këtij emri, duke bërë që aktualisht të mos jenë të sigurta votat e nevojshme për zgjedhjen e presidentit në dy rundet e para.

Për zgjedhjen e presidentit në rundet e para nevojiten 80 vota të deputetëve.

Kryetari i LDK-së, Lumir Abdixhiku, ka deklaruar se në rast të dështimit të zgjedhjes së presidentit, zgjedhjet e reja mbeten opsioni i vetëm.

Tashmë vëmendja është te seanca e sotme dhe mundësia që partitë të gjejnë një zgjidhje për tejkalimin e ngërçit politik./Albinfo.ch

---