A e dini në cilat vende dënohet shpifja me burg?

Kodi i Procedurës Penale të Gjermanisë dhe Austrisë parashikojnë dënim me gjobë dhe burg për shpifjen

Instituti Ndërkombëtar i Medias (International Press Institute) ka në faqen e tij zyrtare të internetit legjislacionin e vendeve evropiane që dënojnë shpifjen nga gjobë deri në burgim.

Kodi i Procedurës Penale të Gjermanisë dhe Austrisë parashikojnë dënim me gjobë dhe burg për shpifjen.

Sipas nenit 186 të Kodit gjerman të Procedurës Penale, shpifja përcaktohet si “pohim apo shpërndarje e një fakti të lidhur me një tjetër person, që mund të dëmtojë reputacionin e tij apo mund të ndikojë negativisht në opinionin publik për të”, transmeton “ATSH”.

Ajo dënohet me gjobë apo burgim deri në një vit. Një dënim me burg deri në dy vite mund të vendoset nëse veprimi është “kryer publikisht apo nëpërmjet shpërndarjes së materialeve”, përcjell albinfo.ch.

Ndërkohë, sipas nenit 187 të këtij kodi, përgojimi konsiston “në një deklaratë shpifëse, të cilën folësi e di që është false dhe që përdoret për të dëmtuar reputacionin e personit apo për të rrezikuar besueshmërinë e tij”. Dënimi është gjobë apo burgim deri në dy vite. Dënimi deri në pesë vjet mund të vendoset nëse veprimi është bërë publikisht apo nëpërmjet medias.

Ndërkohë, Kodi austriak i Procedurës Penale, në nenin 297 përcakton se shpifja është të akuzosh dikë për një veçori ose prirje të keqe, sjellje të pandershme ose një sjellje fyese ndaj moralit të mirë, që mund ta denigrojë atë person ose mund ta dëmtojë atë në sytë e publikut.

Dënimi përfshin gjashtë muaj burg ose me gjobë të barazvlefshme me 360 ditë pune. Për shpifje të kryer nëpërmjet medias, televizionit “ose me ndonjë mjet tjetër nëpërmjet të cilit përmbajtja e shpifjes është bërë e arritshme për një publik më të gjerë”, ndëshkimi i mundshëm është deri në një vit burg ose gjobë të barazvlefshme me 760 ditë pune.

Për përgojimin, kodi austriak thotë se është “të akuzosh një person tjetër gabimisht dhe me vetëdije për një vepër penale, për moszbatim të një detyre zyrtare, në atë mënyrë që e vë personin në rrezik për ndjekje penale. Dënimi është deri në një vit burg ose gjobë e barazvlefshme deri në 720 ditë pune.

Megjithatë, nëse akuza ka të bëjë me një vepër penale që dënohet me burgim mbi një vit, dënimi përfshin gjashtë muaj deri në pesë vjet burg.

Vendet që dënojnë shpifjen me burg          

Gjermania

Holanda

Belgjika

Austria

Spanja

Italia

Suedia

Danimarka

Finlanda

Portugalia

Greqia

Islanda

Turqia

Polonia

Letonia

Lituania

Republika Çeke

Sllovakia

---